U shënua viktima e 60 në rastin Koçani, ka vdekur menaxheri i diskotekës “Pulse” që po trajtohej në Lituani

Ka vdekur Aleksandër K., menaxher i kabaresë së ashtuquajtur “Pulse” në Koçan, ku më 16 mars 2025 shpërtheu zjarri dhe humbën jetën 59 persona, ndërsa rreth 200 janë lënduar. Ai është viktima e 60-të e tragjedisë në Koçan.

Menaxheri i “Pulse” ka ndërruar jetë teksa po mjekohej në Lituani. Ai ishte një nga të dyshuarit në hetim, raporton 360 Gradë.

Konfirmim zyrtar publik pritet të bëhet në një konferencë për media të Ministrisë së Shëndetësisë të planifikuar për sot në ora 13:30.

Në lidhje me tragjedinë në Koçan, ku humbën jetën 59 persona, dyshohen 27 persona fizikë, tre persona juridikë dhe shtatë policë nga Shtipi dhe Koçani.

Të gjithë të dyshuarve u është caktuar masa e paraburgimit prej 30 ditësh, përveç atyre të shtruar në spital.

Prokurori i shtetit, Ljupço Kocevski, duke prezantuar detajet fillestare të hetimit të hapur, tha se tre nga gjithsej 27 personat fizikë të dyshuar figurojnë si persona përgjegjës, bashkëpronarë apo menaxher për një periudhë të caktuar në personin juridik, filial i të cilit është i ashtuquajturi klubi kabare “Puls”.

Përndryshe, pronar i vërtetë i kabaresë konsiderohet D.J.

Ekipi i akuzës që udhëheq hetimet për zjarrin në Koçan përbëhet nga 11 prokurorë publikë.