Turqia do të furnizojë Sirinë me gaz dhe energji elektrike për të ndihmuar infrastrukturën e goditur nga lufta

Ministri i Energjisë dhe Burimeve Natyrore i Türkiyes, Alparslan Bayraktar ka bërë të ditur se vendi i tij do të fillojë furnizimin e Sirisë me gaz natyror dhe energji elektrike në një përpjekje të gjerë eksporti të energjisë, që synon të ndihmojë në rivendosjen e infrastrukturës së energjisë në vendin e shkatërruar nga lufta, transmeton Anadolu.

Duke folur për CNN Turk, Bayraktar tha se Türkiye gjatë tre muajve të ardhshëm planifikon të furnizojë 6 milionë metra kub gaz natyror në ditë, ekuivalente me 2 miliardë metra kub në vit.

Gazi do të transportohet nëpërmjet tubacionit nga provinca juglindore turke Kilis në një termocentral në Halep të Sirisë veriperëndimore për të gjeneruar energji elektrike.

“Ne kemi bërë përparim të shpejtë në Siri, sepse linja jonë e gazit natyror është shtrirë tashmë deri në Kilis pranë kufirit sirian. Ne në fakt do të furnizojmë me karburant termocentralet e gazit atje”, tha Bayraktar.

Përveç gazit, Türkiye eksporton energji elektrike drejtpërdrejtë në Sirinë veriore, për të cilën Bayraktar tha se aktualisht vendi i tij siguron rreth 200 megavat energji elektrike në Halep dhe planifikon ta rrisë ndjeshëm këtë nivel.

“Ne planifikojmë ta rrisim këtë me 500 megavat shtesë, duke synuar të arrijmë midis 700 dhe 800 megavat eksporte të energjisë elektrike në muajt e ardhshëm”, tha ai.

– Kolapsi i infrastrukturës dhe kërkesa urgjente për energji elektrike

Më tej, Bayraktar theksoi gjendjen e mjerueshme të infrastrukturës energjetike të Sirisë pas 13 viteve të luftës. Ai tha se ministri i Energjisë i Sirisë, Mohammed al-Bashir, së fundmi zhvilloi vizitën e tij të parë zyrtare jashtë vendit në Türkiye dhe theksoi mungesën akute të energjisë elektrike në Siri.

“Gjatë takimit tonë dypalësh, ministri më tha ‘kam nevojë për 10 mijë megavat për Sirinë, por mund të gjeneroj vetëm 1.700 megavat për momentin'”, tha Bayraktar.

Me shumicën e sistemeve të centralizuara të shkatërruara, sirianët kanë përdorur zgjidhje në shkallë të vogël për të furnizuar me energji shtëpitë dhe bizneset e tyre. “Kudo që të shkoni sot në Siri, do të shihni gjeneratorë para çdo shtëpie. Njerëzit po përpiqen të gjenerojnë energji në një mënyrë mobile. Pra, kontributi ynë është i rëndësishëm”, tha Bayraktar.

“Burimet e naftës, gazit dhe mineraleve të Sirisë duhet të përfshihen shpejt në ekonomi për të përmbushur nevojat e saj”, tha ministri turk, duke shtuar se roli i vendit të tij në eksportet e energjisë mund të jetë një faktor stabilizues në rajon.

MARKETING