QMK: 31 zjarre të regjistruara në 24 orët e fundit, një ende aktiv

Deri në orën 07:30 të mëngjesit të sotëm, në territorin e Maqedonisë së Veriut janë regjistruar gjithsej 31 zjarre në hapësira të hapura, njofton Qendra për Menaxhim me Kriza (QMK).

MARKETING

Sipas QMK-së, një zjarr është ende aktiv, tre janë nën kontroll, ndërsa 27 zjarre janë shuar.

Zjarri aktiv është raportuar në Komunën e Gjorçe Petrovit, në fshatin Graçani, ndërsa sipas informacionit të QMK-së, ai ndodhet aktualisht në territorin e Republikës së Kosovës, në zonë pyjore.

Ndërkohë, tre zjarre mbeten nën kontroll. Njëri prej tyre është në Komunën e Sarajit, në fshatin Kopanicë, ku është përfshirë pyll me rritje të ulët dhe bimësi të ulët.

Një tjetër zjarr është në Komunën e Çuçer-Sandevës, në fshatin Brest, në zonën e Ramenos, në Malin e Zi të Shkupit, ku është përfshirë pyll i përzier.

Zjarri i tretë nën kontroll ndodhet në Komunën e Strugës, në hapësirën ndërmjet fshatrave Burinec dhe Llokovë, në zonë me pyll me rritje të ulët.

Autoritetet vijojnë monitorimin e situatës dhe marrjen e masave për lokalizimin dhe shuarjen e zjarreve.

MARKETING