Projekti rajonal për menaxhim me mbeturina të ngurta, të financuar nga BERZH-i, merr financim shtesë
Zëvendëskryeministri i parë dhe ministri i Mjedisit Jetësor dhe Planifikimit Hapësinor Izet Mexhiti, ambasadori Mihalis Rokas dhe përfaqësuesja e Bankës Evropiane për Rindërtim dhe Zhvillim (BERZH) Biljana Milosheska nënshkruan sot grant marrëveshje si pjesë e Projektit rajonal për menaxhim me mbeturina të ngurta, të financuar përmes Fondit të përbashkët evropian për Ballkanin Perëndimor.
Granti, me vlerë prej dy milionë euro, është dedikuar për zbatimin e studimeve të fizibilititetit dhe analizave në aspekt të mjedisit jetësor dhe social për rajonin e Vardarit dhe atë Juglindor.
Mexhiti theksoi se ky është parakusht kyç për aktivizimin e transhit të dytë të projektit për përgatitjen e dokumenteve të projektit dhe më në fund për ndërtimin praktik të infrastrukturës që vijon.
“Kjo fazë përfaqëson vazhdimin e transhit 1, i cili tashmë është duke u realizuar në rajonet e Pellagonisë, Pollogut dhe Jugperëndimit. Me transhën e dytë nga projekti është parashikuar ndërtimi i deponisë sanitare rajonale në rajonin e Vardarit dhe Juglindor sipas standardeve evropiane, rehabilitimin dhe mbylljen e deponive ekzistuese të parregullta, ndërtimin e stacioneve, furnizimin e automjeteve për mbledhjen dhe transportin e mbeturinave, mekanizimin modern për menaxhimin me deponitë”, theksoi Mexhiti.
Euroambasadori Rokas beson se menaxhimi me mbeturina të ngurta është çështje urgjente dhe shtoi se nevojiten aktivitete dhe veprime të rëndësishme për të përmirësuar cilësinë e jetës dhe për të transformuar mjedisin jetësor. Ne, siç tha, ju ofrojmë ndihmë, financiare dhe eksperte, në mënyrë që të mund të tejkalohen këto probleme dhe së bashku me mjetet IPA, të cilat i kemi ndarë prej 50 milionë euro në interes të këtij projekti.
“Ruajtja e bukurisë natyrore të Maqedonisë së Veriut kërkon luftë të vendosur dhe rigoroze kundër mbeturinave të ngurta në nivel qendror dhe lokal. Me dy milionë euro grant nga Programi i investimeve në Ballkanin Perëndimor, vazhdojmë angazhimin e BE-së për të mbështetur vendin në gjetjen e zgjidhjeve më të mira për të adresuar problemin e mbeturinave të ngurta. Ky është vetëm fillimi i mbështetjes së vazhdueshme financiare të BE-së për Maqedoninë e Veriut në fushën e mjedisit jetësor dhe menaxhimit me mbeturina”, potencoi Rokas.
Milloshevska deklaroi se ky projekt paraqet hap të rëndësishëm drejt një të ardhme më të gjelbër dhe më të qëndrueshme në vend.
“Kjo është iniciativa e parë e Bankës në këtë sektor, ku mbështetet zbatimi i sistemeve të menaxhimit me mbeturina në përputhje me standardet e BE-së, për më shumë se një milion banorë në tre zona rajonale të planit dhe 45 komuna”, nënvizoi Milloshevska.
MARKETING
