(VIDEO) Sindikatat bëhen bashkë për të protestuar më 1 maj

Lidhja e Sindikatave të Maqedonisë së Veriut (LSM) dhe Konfederata e organizatave sindikale të Maqedonisë së Veriut (KOSM) sot bënë thirrje të përbashkët për të gjithë punëtorët që të bashkohen me sindikatat për të dalë më 1 maj në protestë. Ashtu siç kanë informuar ata protesta do të fillojë në orën 11 para Shtëpisë së punëtorëve me moton “Ne punëtorët”.

Siç informojnë nga LSM-ja, për këtë, është dakorduar në takimin e përbashkët të kryetarit të LSM-së Sllobodan Trendafilov dhe sekretarit të Këshillit të LSM-së Zllatko Cvetkovski me kryetarin e KOSM-it Marjan Risteski dhe sekretarin e përgjithshëm të KOSM-it Goce Dellçev Todev.

Lidhja e Sindikatave të Maqedonisë së Veriut (LSM)

“LSM dhe KOSM dëgjuan kërkesat e punëtorëve për nevojën e bashkimit të sindikatave dhe këtë vit së bashku organizojnë protestën e punëtorëve në Ditën ndërkombëtare të punës, 1 maj. Lidhja e Sindikatave të Maqedonisë dhe Konfederata e organizatave sindikale të Maqedonisë së bashku dalin në protestën e punëtorëve më 1 maj me moton “Ne punëtorët”.

Kujtojmë që shkaku i kësaj proteste të LSM-së është kthimi i shpenzimeve të ushqimit dhe transportit, ku siç ata thonë, është një e drejtë e tyre e humbur në vitin 2009, për shkak të sistemit të llogaritjes së pagës bruto në Maqedoni.

Ata theksojnë edhe objektivat e tyre, ku kërkojnë kthimin e shpenzimeve për ushqim dhe transport në vlerë prej 20% të pagës mesatare dhe rritje të pagës minimale, në të paktën 450 euro, tashmë në 100 ditët e para të qeverisjes së re. /SHENJA/