Palestina i bën thirrje komunitetit ndërkombëtar ta sigurojë mbrojtjen e grave palestineze

Palestina i bëri thirrje komunitetit ndërkombëtar ta marrë përgjegjësinë për ta garantuar mbrojtjen e grave palestineze dhe për ta afirmuar të drejtën e tyre për të jetuar në siguri dhe paqe.

“Gruaja palestineze qëndron në qendër të luftës për mbijetesë, duke mbajtur barrën më të madhe të gjenocidit, krimeve kundër njerëzimit dhe përpjekjeve për zhvendosje të detyruar dhe spastrim etnik”, tha Ministria e Jashtme në një deklaratë për Ditën Ndërkombëtare të Gruas.

Ministria theksoi se “mbi 519 ditë të luftës së Izraelit në Gaza kanë rezultuar në vrasjen e më shumë se 12.298 grave, me mijëra të tjera që i janë nënshtruar zhvendosjes së detyruar”.

Për më tepër, 21 gra palestineze aktualisht mbahen në “kushte të ashpra dhe çnjerëzore në burgjet izraelite, ku ato durojnë torturën, izolimin dhe neglizhencën mjekësore”, tha ministria.

Ministria dënoi gjithashtu “pengimin e ndihmës urgjente humanitare nga Izraeli, duke përfshirë ushqimin, ilaçet dhe furnizimet thelbësore për gratë dhe vajzat, duke përkeqësuar më tej vuajtjet e tyre në mes të gjenocidit të vazhdueshëm”.

Ministria u bëri thirrje komiteteve ndërkombëtare që “të kryejnë hetim të plotë mbi dhunën sistematike kundër grave palestineze” dhe ta mbajnë Izraelin përgjegjës për “krimet dhe shkeljet e tij, përfshirë terrorizmin e kolonëve”.

Izraeli ndaloi hyrjen e ndihmave humanitare në Gaza më 2 mars pasi kryeministri Benjamin Netanyahu refuzoi të fillonte negociatat për fazën e dytë të marrëveshjes trefazore të armëpushimit midis Tel Avivit dhe grupit të rezistencës palestineze Hamas.

Një marrëveshje armëpushimi dhe shkëmbimi i të burgosurve ka qenë në fuqi në Gaza që nga 19 janari, duke ndalur luftën brutale të Izraelit, e cila ka vrarë mbi 48.400 palestinezë, shumica prej tyre gra dhe fëmijë, si dhe e ka lënë enklavën në gërmadha.

Nëntorin e kaluar, Gjykata Ndërkombëtare Penale lëshoi urdhra arresti për Netanyahun dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

MARKETING