SHBA-ja kundërshton armëpushimin në Gaza: Nga kjo përfiton Hamasi
Shtetet e Bashkuara të Amerikës kanë përsëritur refuzimin e thirrjeve për një armëpushim në Gaza, duke argumentuar se një veprim i tillë do t’i jepte grupit palestinez Hamas një mundësi për t’u rigrupuar dhe përgatitur për sulme të mëtejshme kundër Izraelit, raporton Anadolu.
“Çfarëdo armëpushimi do t’i japë mundësinë që të pushojë, të rigrupohet dhe të përgatitet për të vazhduar sulmet terroriste kundër Izraelit”, tha zëdhënësi i Departamentit Amerikan të Shtetit, Matthew Miller, duke iu drejtuar gazetarëve gjatë një konference të përditshme për shtyp.
“Shumë qartë mund ta kuptoni se pse kjo është një situatë e patolerueshme për Izraelin, pasi do të ishte një situatë e patolerueshme për çdo vend që ka pësuar një sulm kaq brutal terrorist dhe vazhdon të shohë kërcënimet terroriste pikërisht në kufirin e saj”, tha Miller.
Ai vuri në dukje gjithashtu se i dërguari i posaçëm i SHBA-së, David Satterfield, po punon “intensivisht” në terren për të lehtësuar kalimin e ndihmës humanitare përmes kalimit Rafah dhe për të siguruar largimin e sigurt të qytetarëve amerikanë dhe shtetasve të tjerë të huaj.
Javën e kaluar, SHBA-ja tërhoqi kritika për veton ndaj një rezolute të Këshillit të Sigurimit të OKB-së që kërkon “pauza humanitare” në konfliktin e vazhdueshëm izraelito-palestinez për dërgimin e ndihmave në Gaza.
Konflikti në Gaza, i cili ka qenë nën bombardimet izraelite dhe një bllokadë që nga 7 tetori, filloi kur Hamasi nisi operacionin “Tufani i Aksasë”, një sulm i papritur i shumëdimensional që përfshinte lëshimin e një breshërie raketash dhe infiltrimin në Izrael nga toka, deti dhe ajri. Grupi tha se inkursioni ishte në shenjë hakmarrje për sulmet në Xhaminë Al-Aksa dhe dhunën në rritje të kolonëve izraelitë kundër palestinezëve.
Ushtria izraelite më pas nisi operacionin Shpata e Hekurt kundër objektivave të Hamasit në Rripin e Gazës.
Gati 6.500 njerëz janë vrarë në konflikt, duke përfshirë të paktën 5.087 palestinezë dhe më shumë se 1.400 izraelitë.
MARKETING
