Nefi Huseini i Voska Sport përgëzon Ballkanin për arritjet evropiane

Pronari i Voskës, Useini personalisht Kabashit i përcolli urimet dhe vlerësimin maksimal për punën dhe sukseset e Ballkanit në skenën Evropiane, arritje që bëjnë krenarë shqiptarët e të gjitha trojeve.

Histori e bukur futbollistike me nivel evropian po shkruhet nga Ballkani i Suharekës. Dy herë kampionët e Kosovës për të dytin vit rresht luan në grupet e UEFA Conference League, ku së fundmi prodhuan seanzacion duke mundue 2:0 Dinamo Zagrebin.

Edhe pse e krijuar 74 vite më parë si KF Rinia, gjithsesi Ballkani është skuadër relativisht e re në nivele serioze e që shënon suksese të pa prekura paraprakisht nga ndonjë skuadër shqiptare.

Ndërkohë ekip i ri në skenën futbollistike është edhe Voska Sport nga Ohri, skuadër debutuese këtë vit në elitën e futbollit në Maqedoninë e Veriut. I futur tashmë me zemër e pasion në këtë sport magjik, i pari i Voskës, Nefi Useini din të vlerësojë mirë arritjet e Ballkanit dhe me këtë rast ai personalisht ka udhëtuar drejt Kosovës për të takuar numrin një të Ballkanit, Arsim Kabashin. Një takim i ngrohtë mes pronarësh e investitorësh në futboll, ku Useini personalisht Kabashit i përcolli urimet dhe vlerësimin maksimal për punën dhe sukseset e Ballkanit në skenën Evropiane, arritje që bëjnë krenarë shqiptarët e të gjitha trojeve. Presidenti i Ballkanit vlerësoi vizitën e pronarit të Voskës, derisa Kabashi e Useini u dakorduan që të takohen më shpesh për forcim të bashkëpunimit mes dy klubeve. Në takimin në fjalë mori pjesë edhe Enver Sulejmani, ish-zëvendës sekretar i përgjithshëm i FFM-së, punëtor shumëvjeçarë te Shkëndija e Renova, ndërsa tashmë sipas zërave që vinë nga Ohri, pritet të kyçet në strukturat e Voska Sportit.

Pllaketa e dhuruar nga ana e Useinit do të shënojë takimin e parë mes dy klubeve, të cilat për kuriozitet udhëhiqen e sponsorizohen nga dy drejtues të kompanive të fuqishme për ndërtimtari në vendet respektive.