Zëdhënësi i Kremlinit: Serbia është nën presion të paprecedentë

Zëdhënësi i Kremlinit, Dmitry Peskov, ka thënë të martën se në këtë moment po ushtrohet presion i paprecedentë në shumë vende të botës, veçanërisht ndaj Serbisë.

Në këtë kontekst, ai ka thënë se “Moska pret që çështjet më problematike të zgjidhen në kuadër të një dialogu konfidencial dhe partneriteti me miqtë serbë”.
“Ne e kuptojmë në mënyrë të përkryer se çfarë lloj presioni të paprecedentë, të ashpër, të paligjshëm, në kundërshtim me të drejtën ndërkombëtare, ushtrohet mbi shumë vende, përfshirë Serbinë. Për Serbinë në veçanti. Dhe ne e vlerësojmë shumë qëndrimin që ka marrë Serbia deri më tani, ne e kuptojmë se kushtet po ndryshojnë, por presim që çështjet më problematike t’i zgjidhim në kuadër të dialogut tonë të partneritetit konfidencial me miqtë tanë serbë”, u ka thënë Peskov gazetarëve, raporton “RIA Novosti”.

Ndërsa gazeta “Izvestia”, ka raportuar se Peskov ka komentuar deklaratën e ministrit të ekonomisë së Serbisë, i cili të hënën ka kërkuar që Qeveria e Serbisë të shpallë urgjentisht vendosjen e sanksioneve ndaj Rusisë.
“Vendi ynë tashmë po paguan një çmim të lartë për mosvendosjen e sanksioneve ndaj Rusisë dhe po bëhet e padurueshme”, ka thënë Rade Basta.

MARKETING