30 vjet marrëdhënie diplomatike, Maqedonia e Veriut dhe Kamboxhia synojnë një kapitull të ri bashkëpunimi

Zëvendësministri i Punëve të Jashtme dhe Tregtisë së Jashtme, Zoran Dimitrovski, i cili kryeson delegacionin e Maqedonisë së Veriut në Konferencën Ministrore të Frankofonisë në Phnom Penh, është takuar sot me kryeministrin e Mbretërisë së Kamboxhias, Samdech Moha Borvor Thipade Khin Manet.

MARKETING

Gjatë takimit, Dimitrovski shprehu mirënjohjen për mikpritjen dhe pritjen e ngrohtë, ndërsa përcolli edhe urimet e kryeministrit Hristijan Mickoski me rastin e Ditës së Pavarësisë së Kamboxhias, e cila shënohet më 9 nëntor.

Ai theksoi se këtë vit shënohen 30 vjet nga vendosja e marrëdhënieve diplomatike ndërmjet dy vendeve, duke vlerësuar se ky përvjetor përbën një mundësi të mirë për t’i dhënë një shtysë të re bashkëpunimit të ndërsjellë.

Në këtë drejtim, Dimitrovski nënvizoi rëndësinë e intensifikimit të marrëdhënieve dypalëshe në të gjitha fushat me interes të përbashkët, me fokus të veçantë në bashkëpunimin ekonomik dhe tregtar. Ai gjithashtu përcolli një ftesë për kryeministrin kamboxhian që të vizitojë Maqedoninë e Veriut.

Dimitrovski përgëzoi autoritetet kamboxhiane për organizimin e Konferencës Ministrore dhe Samitit të 20-të të Frankofonisë në Phnom Penh. Ai theksoi se anëtarësimi në Organizatën Ndërkombëtare të Frankofonisë, si dhe bashkëpunimi në kuadër të Kombeve të Bashkuara dhe forumeve të tjera shumëpalëshe, përbëjnë një bazë të rëndësishme për thellimin e marrëdhënieve dhe forcimin e mbështetjes së ndërsjellë në arenën ndërkombëtare.

Nga ana e tij, kryeministri kamboxhian Hun Manet vlerësoi se ekziston potencial i konsiderueshëm për avancimin e mëtejshëm të bashkëpunimit ndërmjet dy vendeve. Ai theksoi nevojën e organizimit të konsultimeve politike dypalëshe, si një mekanizëm për identifikimin e fushave konkrete dhe mundësive të reja të bashkëpunimit.

Kryeministri kamboxhian shprehu gjithashtu krenarinë për organizimin e Samitit të 20-të të Frankofonisë, i cili mbledh përfaqësues nga më shumë se 90 vende dhe përfaqëson një platformë të rëndësishme të solidaritetit, dialogut dhe bashkëpunimit brenda familjes frankofone.

MARKETING