VLEN: Harta e kazinove në shtet vizatohej te Artan Grubi

Koalicioni VLEN ka reaguar përmes një kumtese, duke akuzuar Bashkimin Demokratik për Integrim  se po tenton të manipulojë opinionin publik lidhur me çështjen e kazinove dhe lojërave të fatit.

Sipas deklaratës së VLEN-it, BDI “është ushqyer dhe mbajtur për vite me radhë nga industria e lojërave të fatit”, ndërsa sot, sipas tyre, po mundohet të distancohet nga një sektor që vetë e ka ndikuar ndër vite.

Në kumtesë thuhet se është “absurde” që, siç pretendojnë ata, të njëjtët aktorë që kanë pasur rol në zhvillimin e këtij sektori, tani paraqiten si kritikë të tij.

VLEN gjithashtu hedh akuza ndaj figurave të larta të BDI-së, përfshirë Artan Grubin, duke pretenduar se përmes bashkëpunëtorëve të tij është ushtruar ndikim në licencimin dhe menaxhimin e industrisë së lojërave të fatit. Në deklaratë përmendet edhe një ish-zyrtar i arratisur, Përparim Bajrami, si pjesë e këtyre pretendimeve.

Sipas VLEN-it, çështja e kazinove nuk është një problem i ri, por një “trashëgimi politike” e BDI-së, dhe ata i bëjnë thirrje kësaj partie që të adresojë, siç thonë, të kaluarën e vet lidhur me këtë sektor.

BDI nuk ka dhënë ende një reagim të detajuar ndaj këtyre deklaratave në momentin e publikimit të kumtesës së VLEN-it.

MARKETING