(VIDEO) FFM dhe sponsori i Shkëndijës përplasen pas vendimit disiplinor, reagojnë edhe “Ballistët”

Pas vendimit të fundit të Federatës së Futbollit të Maqedonisë ndaj Shkëndijës, ka pasur reagime të ndërsjella mes federatës dhe sponsorit të klubit. Sponsori i Shkëndijës ka kërkuar rishikim urgjent të vendimit, duke vlerësuar se klubi ka funksionuar me korrektësi dhe ka dhënë kontribut të rëndësishëm në futbollin vendor dhe ndërkombëtar. Sipas tij, paraqitjet e Shkëndijës në garat evropiane kanë ndikuar pozitivisht në koeficientin e ligës, nga i cili përfitojnë të gjitha klubet në vend. Ai e cilëson vendimin të dëmshëm për projektin sportiv dhe paralajmëron edhe mundësinë e tërheqjes nga klubi nëse situata nuk ndryshon. Nga ana tjetër, FFM ka reaguar duke theksuar se klubi po përpiqet të zhvendosë vëmendjen nga incidentet e finales së Kupës së Maqedonisë. Federata deklaron se asnjë presion apo kërcënim nuk do të ndikojë në vendimet e saj dhe se rregullat vlejnë njësoj për të gjitha klubet, veçanërisht sa i përket rendit dhe disiplinës. FFM shton se përfitimet nga garat evropiane burojnë nga pjesëmarrja në kampionatin vendor dhe se sistemi është i njëjtë për të gjithë klubet. Në reagim theksohet gjithashtu se kritikat ndaj udhëheqjes së federatës janë të pabazuara, duke rikujtuar sukseset e Shkëndijës në sezonin e kaluar me të njëjtin menaxhim. Sa i përket paralajmërimeve për tërheqje të sponsorit, FFM e cilëson këtë si vendim biznesi që respektohet, por thekson se nuk ndikon në vendimmarrjen e saj. Federata deklaron se çështja konsiderohet e mbyllur dhe se parimi i barazisë para rregullave mbetet i pandryshuar për të gjitha klubet. Në reagime është përfshirë edhe tifogrupi “Ballistët”, i cili ka shprehur mbështetje për klubin dhe ka vlerësuar se dënimi është i padrejtë. /SHENJA/

MARKETING