(VIDEO) Ceremonia qendrore e Kurban Bajramit u mbajt në xhaminë Mustafë Pasha

Me lutje për paqe, mirësi dhe solidaritet, besimtarët myslimanë në vend pritën sot festën e Kurban Bajramit. Që në orët e hershme të mëngjesit, xhamitë u mbushën me besimtarë të cilët u mblodhën për të shënuar një nga festat më të rëndësishme islame, që simbolizon sakrificën, solidaritetin dhe afrimin mes njerëzve.

MARKETING

Atmosferë festive pati edhe në Xhaminë Mustafë Pasha në Shkup, ku u mbajt ceremonia qendrore e organizuar nga Bashkësia Fetare Islame e Maqedonisë së Veriut. Nga kjo xhami u përcollën urime dhe mesazhe për paqe, unitet e mirësi, ndërsa kreu i BFI-së, Shaqir Fetahu foli për rëndësinë dhe vlerat që sjell festa e Kurban Bajramit. Ai tha se në këto ditë kryhet kushti i 5-të themelor të islamit, Haxhi në vendet e shenjta dhe se në të njejtën kohë, në këto ditë kryhet obligimi i domosdoshëm për të gjithë besimtarët, prerja e kurbanit, të cilin e kanë obligim të gjithë ata që kanë mundësi materiale.

Shaqir Fetahu kreu i BFI-së

“Sot kemi ditën e madhe për të gjithë besimtarët, festën e kurban bajramit. Allahu xh.sh na e bëftë kabull namazin e Kurban Bajramit që e krymë sot në xhaminë e Mustafa Pashës. Festa e Kurban Bajramit vërtetë është një ditë e madhe për të gjithë myslimanët e vendit dhe jashtë vendit sepse në këto ditë kryhet kushti i 5-të themelor Haxhi në vendet e shenjta në Qabe, Arafat, në Zelife, Mine dhe shumë vende tjera. Në të njejtën kohë, është festë e madhe për arsye se në këto ditë kryhet obligimi i domosdoshëm për të gjithë besimtarët, prerja e kurbanit, të cilin e kanë obligim të gjithë ata që kanë mundësi materiale, andaj kjo festë është festë e afrimit në mes njerëzve, festë e solidaritetit, festë e humanitetit dhe festë e pajtimit, unitetit, afrimit familjar dhe shumë vlerave tjera”.

E mes urimeve, lutjeve dhe atmosferës festive, besimtarët myslimanë shënuan edhe këtë vit Kurban Bajramin, duke përcjellë mesazhe paqeje, solidariteti dhe afrimi mes njerëzve. Ndërkaq, qytetarët vazhduan vizitat familjare dhe shpërndarjen e kurbanit për ata që kanë nevojë, duke ruajtur kështu frymën humane dhe domethënien e kësaj feste të madhe islame.

Anida Murati /SHENJA/