Të paktën 28 të vdekur nga një ortek që përfshiu një autostradë në Kinë
Një operacion shpëtimi për të gjetur njerëz të bllokuar në një ortek në një autostradë tibetiane tani ka përfunduar, derisa raportohet se numri i të vdekurve është të paktën 28.
Njerëzit mbetën të bllokuar në automjetet e tyre pasi bora përfshiu daljen e një tuneli në qytetin juglindor të Nyingchi në Kinë të martën në mbrëmje, raportoi BBC-ja të shtunën.
Ekipet e shpëtimit vendas thanë se orteku ishte “shkaktuar nga erërat e fuqishme”. Nuk dihet se sa persona janë ende të zhdukur.
Megjithatë, 53 të mbijetuar u gjetën, pesë prej të cilëve të lëndua rëndë, sipas Global Times, duke cituar një zyrtar të qeverisë lokale. Agjencia shtetërore e lajmeve Xinhua raportoi se autoritetet lokale dërguan 1,348 punëtorë shpëtimi dhe 236 pajisje për të ndihmuar në gërmimin e një kalimi prej 7.5 km.
Orteku mbuloi një autostradë që lidh qytetin Pai në kontenë Mainling dhe qarkun Medog në Tibet, një rajon i largët dhe kryesisht budist në Kinën perëndimore.
Mali ka një lartësi prej afro 4,500 metra si dhe shpate të pjerrëta dhe një pjesë e rrugës që kalon përgjatë tij është e thyer. Rritja e temperaturave luajti gjithashtu një rol në katastrofë, thanë ekspertët nga shtabi lokal i shpëtimit emergjent për Xinhua.
Himalajet shpesh goditen nga ortekët, pasi janë shtëpia e maleve më të larta në botë. Të paktën 26 njerëz vdiqën në tetor pasi një ekspeditë alpinistike u kap nga një ortek në malin Draupadi ka Danda-II, në shtetin verior të Indisë, Uttarakhand.
MARKETING
