Aksident i rëndë në autostradën “Ibrahim Rugova”, shtatë persona të lënduar

Një aksident i rëndë trafiku ka ndodhur këtë të shtunë në kilometrat e fundit të autostradës “Ibrahim Rugova”, pranë pikës kufitare të Morinit.

Sipas informacioneve paraprake, në aksident janë përfshirë gjashtë automjete, ndërsa si pasojë kanë mbetur të lënduar shtatë persona. Në mesin e tyre janë edhe një fëmijë dhe një grua shtatzënë në muajin e shtatë të shtatzënisë.

Të lënduarit janë transportuar me autoambulanca në Spitalin Rajonal të Prizrenit, ku po marrin trajtimin e nevojshëm mjekësor. Deri më tani nuk është raportuar për viktima, ndërsa autoritetet ende nuk kanë dhënë detaje lidhur me gjendjen shëndetësore të të lënduarve.

Në vendin e ngjarjes kanë dalë njësitet e Policisë së Kosovës dhe ekipet e emergjencës, të cilat kanë ndërhyrë për t’u ofruar ndihmë të lënduarve, si dhe për të siguruar dhe normalizuar qarkullimin në zonë.

Për shkak të aksidentit, njëra korsi e autostradës në drejtimin Prizren–Morinë është bllokuar, duke shkaktuar kolona të gjata automjetesh dhe vonesa në trafik. Policia u ka bërë thirrje qytetarëve që, nëse kanë mundësi, të shmangin këtë segment rrugor ose të respektojnë udhëzimet e zyrtarëve në terren.

Shkaqet e aksidentit mbeten ende të paqarta. Policia e Kosovës pritet të publikojë më shumë informacione pas përfundimit të hetimeve dhe ekzaminimit të vendit të ngjarjes.

MARKETING