Gjermania do të presë javën e ardhshme samitin e aleatëve të Ukrainës

Kancelari gjerman, Friedrich Merz, do të presë javën e ardhshme në Berlin një samit të “Koalicionit të të Gatshmëve”, së bashku me presidentin francez, Emmanuel Macron dhe kryeministrin britanik, Andy Burnham, transmeton Anadolu.

MARKETING

Zv/zëdhënësi i qeverisë, Sebastian Hille, njoftoi se takimi, i titulluar “Të bashkuar për paqen në Ukrainë dhe sigurinë evropiane”, do të mbahet të enjten në Kancelarinë Federale.

Hille tha se bisedimet do të përqendrohen në koordinimin e përpjekjeve aktuale diplomatike, garancitë e sigurisë për Ukrainën dhe vazhdimin e mbështetjes për Kievin.

“Gjermania, si mbështetësja më e madhe e Ukrainës, po merr përsipër përgjegjësinë e saj. Mbështetja jonë është në interes të Gjermanisë dhe Evropës, sepse rezultati i kësaj lufte do të përcaktojë sigurinë e Evropës për një kohë të gjatë. Qëllimi i përbashkët i ‘Koalicionit të të Gatshmëve’ mbetet një paqe e drejtë dhe e qëndrueshme për Ukrainën”, deklaroi ai.

Në takim, i cili do të mbahet në kryeqytetin gjerman, pritet të marrin pjesë më shumë se 20 krerë shtetesh dhe qeverish nga vendet e koalicionit, si dhe zyrtarë të lartë.

“Koalicioni i të Gatshmëve” bashkon vendet që janë të përkushtuara për mbështetjen e vazhdueshme të Ukrainës, jashtë kornizës formale të vendimmarrjes së NATO-s.

Duke folur në Dublin pas një samiti joformal të Bashkimit Evropian (BE), Merz përshkroi dy objektiva kryesore të takimit në Berlin.

“Së pari, financimi i mbrojtjes së Ukrainës për vitin e ardhshëm, pra për vitin 2027, së dyti, një qëndrim i ripërtërirë dhe i përbashkët lidhur me bisedimet e ardhshme të paqes”, tha kancelari.

Gjermania ka qenë ofruesja më e madhe e vetme e ndihmës ushtarake dhe financiare për Ukrainën që nga fillimi i luftës Rusi-Ukrainë në vitin 2022.

Sipas të dhënave të qeverisë gjermane, Berlini ka ofruar ose ka ndarë mbi 45,7 miliardë euro për ndihmë civile dhe rreth 57,8 miliardë euro për mbështetje ushtarake, duke e çuar vlerën e përgjithshme në afër 103,5 miliardë euro.

Ndihma civile përfshin mbështetjen për ukrainasit që jetojnë në Gjermani, ndërsa shifra për ndihmën ushtarake përfshin si ndihmën e dorëzuar tashmë, ashtu edhe zotimet për vitet e ardhshme.

MARKETING