BDI kërkon zgjedhje të parakohshme: “Nuk ka arsye për vonesa”
Bashkimi Demokratik për Integrim ka reaguar ndaj deklaratës së kryeministrit Hristijan Mickoski për mundësinë e mbajtjes së zgjedhjeve të parakohshme parlamentare, duke kërkuar që kjo ofertë të kthehet menjëherë në veprim.
MARKETING
BDI thotë se është e gatshme për zgjedhje dhe kërkon që Kuvendi të shpërndahet dhe të caktohet data e zgjedhjeve.
“Bashkimi Demokratik për Integrim përshëndet gatishmërinë e shprehur nga kryeministri Hristijan Mickoski për mbajtjen e zgjedhjeve të parakohshme parlamentare, nëse këtë e kërkon opozita.
E kërkojmë.
Më në fund edhe kryeministri e ka kuptuar se kjo gjendje është e paqëndrueshme dhe se vendi ka nevojë për një mandat të ri politik.
Qeveria e humbi legjitimitetin për të vazhduar me izolimin evropian, degradimin e marrëdhënieve ndëretnike, cenimin e Marrëveshjes së Ohrit dhe dobësimin e përfaqësimit të shqiptarëve në institucione.
Prandaj, BDI kërkon që deklarata e kryeministrit të shndërrohet menjëherë në veprim.
Kërkojmë që brenda ditëve të përcaktohet afati më i shpejtë kushtetues, të fillojnë përgatitjet zgjedhore dhe qytetarëve t’u jepet mundësia të vendosin për drejtimin e vendit.
Nëse oferta e kryeministrit është serioze, nuk ka arsye për vonesa, arsyetime apo kalkulime politike.
Opozita e ka dhënë përgjigjen e saj.
BDI është e gatshme.
Le të shpërndahet Kuvendi.
Le të caktohet data.
Le të shkojmë në zgjedhje”, thuhet në komunikatën e BDI-së.
MARKETING
