Trajneri serb thirrje tifozëve: Ndeshja me Shqipërinë të zhvillohet në atmosferë fer dhe korrekte

Trajneri i Serbisë, Dragan Stojkoviq u bëri thirrje sot tifozëve përpara ndeshjes kundër Shqipërisë në Leskovac, që ndeshja të zhvillohet në atmosferë fer dhe korrekte, raporton Anadolu.

“Të gjithë ata që vijnë në stadium në emër të të gjithëve, për ne dhe për ju, u bëjmë thirrje që ndeshja të luhet në mënyrë fer dhe korrekte. Nuk do të doja që ne të ndodheshim në një situatë ku do të merrnim ndonjë dënim. Kjo është e panevojshme. Ekipi kombëtar kërkon mbështetje, të brohoritet, t’i urohet fat, të përqendrohemi ekskluzivisht në çështjet e futbollit, kjo është ajo që do t’u kërkoj lojtarëve. Mos fyeni askënd, brohorisni fer dhe në mënyrë korrekte”, tha Stojkoviq.

Futbollistët serbë do të fillojnë sot përgatitjet për kualifikueset e Kupës së Botës 2026 në Stara Pazova. Serbia do të presë Shqipërinë në Leskovac më 11 tetor ndërsa tre ditë më vonë do të udhëtojë në Andorrë.

Stojkoviq deklaroi se ndeshja kundër Shqipërisë është vendimtare në kualifikueset e ardhshme për Kupën e Botës 2026 dhe shtoi se skuadra e tij ka cilësinë për të arritur qëllimin e vendosur dhe për të arritur në fazën eliminatore për Kupën e Botës.

“Varet nga ne, gjithçka është në duart tona, e dimë rëndësinë vendimtare të ndeshjes kundër Shqipërisë. Rruga deri në mars të vitit të ardhshëm dhe eliminatoret po hapet. Kemi forcën dhe cilësinë për ta arritur këtë qëllim”, tha Stojkoviq.

Vendin e parë në renditjen e Grupit K për kualifikueset e Kupës së Botës 2026 e mban Anglia me 15 pikë, Shqipëria ka 8 dhe Serbia 7 pikë. Letonia është e katërta me 4 ndërsa Andorra është e fundit pa pikë.

Fituesi i grupit do të kualifikohet direkt për në Kupën e Botës ndërsa i dyti do të luajë në fazën eliminatore.

“Shqipëria është ekip i shkëlqyer dhe i fortë, një rival i madh për ne në fushën e futbollit. Duke parë tabelën dhe çfarë mund të ndodhë, pres më të mirën për ne. Nuk mund të luash me Francën, Portugalinë, Gjermaninë çdo ditë. Duhet ta luash edhe këtë ndeshje. A është tërheqëse, për disa po, për disa jo. Për mua është kundërshtari më i rëndësishëm për momentin”, shtoi Stojkoviq.

MARKETING