Kasami prezanton Albi Qamilin si bartës të listës së VLEN-it në Tetovë

Kryetari i Komunës së Tetovës, Bilall Kasami, ka prezantuar zyrtarisht Albi Qamilin si bartës të listës së koalicionit VLEN për zgjedhjet e ardhshme lokale në këtë komunë.

Qamili, një emër i njohur në skenën publike të Tetovës, vjen nga fusha e shkencave politike dhe aktualisht ndjek studimet pasuniversitare në drejtimin e së Drejtës Kushtetuese. Gjatë viteve të fundit, ai është angazhuar në mënyrë aktive në çështje shoqërore, nisma rinore dhe debate qytetare, duke u shquar si një zë i rëndësishëm i të rinjve dhe aktivizmit lokal.

Në fjalën e tij gjatë prezantimit, kryetari Kasami vlerësoi energjinë dhe vizionin e Qamilit, duke e cilësuar atë si përfaqësuesin ideal të gjeneratës së re të të rinjve të angazhuar politikisht.

“Me Albin bartës të listës, koalicioni VLEN sjell energjinë e ndryshimit dhe garanton që të rinjtë të kenë zërin dhe vendin e merituar në politikën lokale,” u shpreh Kasami.

Emërimi i Qamilit shihet si një hap drejt përfshirjes më të gjerë të të rinjve në proceset vendimmarrëse dhe një përpjekje për të sjellë freski dhe dinamizëm në skenën politike të Tetovës.

MARKETING