ASH e Taravarit: VLEN të kërkojë fajin te VMRO, ZNAM dhe partia serbe, jo te opozita shqiptare

Aleanca për Shqiptarët e Arben Taravarit ka reaguar ashpër ndaj qasjes së koalicionit VLEN, duke theksuar se problemi kryesor nuk qëndron te opozita shqiptare, por te partnerët qeveritarë të VLEN-it: VMRO-DPMNE, ZNAM dhe Partia Demokratike Serbe.

Sipas deklaratës, këta partnerë qeveritarë po promovojnë politika antishqiptare, duke e përdorur dhe diskredituar VLEN-in në sy të qytetarëve shqiptarë. Aleanca akuzon VLEN-in se po legjitimon në heshtje veprimet diskriminuese të qeverisë aktuale, ndërsa fajin për gjendjen e shqiptarëve po përpiqet t’ia adresojë opozitës.

“VLEN duhet të ndalë së sjelluri si opozitë e rehatshme në pushtet dhe të marrë përgjegjësinë që i takon. Fajtorët kanë emër: VMRO-DPMNE dhe partnerët e tyre, me në krye Hristijan Mickoskin”, thuhet në deklaratë.

Aleanca bën thirrje që VLEN të ndjekë shembullin e saj dhe të kryetarit Arben Taravari, duke u tërhequr nga ajo që e quan “qeveri ekstreme ndaj shqiptarëve”.

Në fund, Aleanca paralajmëron se, nëse rrënimi i Marrëveshjes së Ohrit dhe nënçmimi i shqiptarëve vazhdon, përgjegjësia historike do të rëndojë mbi VLEN-in.

MARKETING