(VIDEO) Aliu: Ekspertë ndërkombëtar do të hetojnë spitalet publike dhe private, reagojnë edhe spitalet private

Ministri i Shëndetësisë, Azir Aliu gjatë konferencës së sotme për media njoftoi se po kërkon kardiokirurgë të huaj, si pjesë e një komisioni ekspertësh, të cilët do të kontrollojnë dokumentacionin në spitalet publike dhe private për të përcaktuar nëse po kryhen ndërhyrje kirurgjikale të panevojshme kardiake. Ai po ashtu tha se do t’iu dërgohet  një letër të gjitha institucioneve private shëndetësore deri më datën  15 të muajit të ardhshëm që të jenë të detyruar të hapin bazat e të dhënave në mënyrë që të mund të grumbullojnë të gjithë informacionet ekzistuese.

Azir Aliu, Ministër i Shëndetësisë

“Një komision tashmë po punon në vendin tonë, nëse ka pengesa ligjore që duhet të hiqen menjëherë, javën tjetër dhe ne do t’u dërgojmë një letër të gjitha institucioneve private shëndetësore deri më datën  15 të muajit të ardhshëm që të jenë të detyruar të hapin bazat e të dhënave në mënyrë që të mund të grumbullojmë të gjithë informacionin ekzistues që ndodhet në institucionet e tyre. Kjo është e drejta e shtetit”.

Ndërkaq, spitali privat “Acibadem Sistina” ka dalë me një deklaratë pas një deklaratëssë kardiologut Sashko Kedev, i cili, në një paraqitje të ftuar në Kanalin 77, tha se në spitalet private kryhen ndërhyrje të panevojshme me qëllim për fitimit më të madh. Nga spitali thonë që këto pretendime janë të pabaza, dëmtojnë reputacionin e institucionit dhe mjekëve të tyre, si dhe mbjellin frikë të panevojshme tek pacientët ekzistues dhe të ardhshëm dhe se për këtë do të ngrenë padi.

 “Acibadem Sistina”, spital privat

“Ata po e sigurojnë publikun se akuzat për ndërhyrje kirurgjikale të supozuara të panevojshme në një spital privat, gjoja për qëllime fitimi, janë plotësisht të rreme dhe nuk mund t’i atribuohen Acibadem Sistina, sepse nuk kanë bazë. Meqenëse deklarata e Dr. Kedev i referohet një spitali privat, pa përmendur se cilin, kërkojmë që ai të deklarojë saktësisht se për cilin spital privat i referohet deklarata e tij. Në të kundërtën, do të ndërmarrim hapa të duhur ligjore dhe do të ngremë padi për shpifje dhe dëmtim të reputacionit”.

Lidhur me këto akuza, ka reaguar edhe Fondi për Sigurim Shëndetësor, nga ku ata thonë që nga ana e tyre janë kryer kontrolle të rregullta në zbatimin e obligimeve të dakorduara me institucionet publike dhe private të shëndetësisë dhe informon se në katër vitet e fundit nuk është regjistruar asnjë ankesë për ndërhyrje të panevojshme mjekësore.

Fondi për Sigurim Shëndetësor

“Në kuadër të kompetencave të veta ligjore, FSSH kryen kontrolle të rregullta të obligimeve të dakorduara me institucionet publike dhe private të shëndetësisë, me qëllim të sigurohet që shërbimet e kujdesit shëndetësor të ofrohen në përputhje me rregulloret ligjore dhe kontratat e lidhura. Në të gjitha institucionet kryhen kontrollet e rregullta vjetore, ndërsa Fondi vepron edhe për ankesat e paraqitura nga pacientët ose për gjetjet e veta. Në katër vitet e fundit, nuk është regjistruar asnjë ankesë për ndërhyrje të panevojshme mjekësore”.

Fondi megjithatë, potencon se nuk ka kompetencë ligjore për të vlerësuar justifikimin mjekësor të ndërhyrjeve të kryera, as për të ushtruar mbikëqyrje inspektuese ndaj punës profesionale të institucioneve shëndetësore, duke treguar se këto kompetenca janë brenda fushëveprimit të Inspektoratit Shtetëror Shëndetësor dhe Sanitar ose të komisioneve të posaçme të formuara nga ministri i Shëndetësisë.

Anida Murati /SHENJA/

MARKETING