Napoli, Rrahmani: Çfarë krenarie të nisësh sezonin si kampion

“Është krenari të fillojmë sërish këtë sezon të ri si kampionë i Italisë, pas 33 vitesh fituam titullin dhe e dimë që tani kemi edhe më shumë përgjegjësi”. Kështu, Amir Rrahmani u përgjigjet pyetjeve të tifozëve të Napolit në faqen e klubit që nga grumbullimi. Qendërmbrojtësi është me Napolin që nga janari i vitit 2020 dhe këtë verë ai pret lëvizjet e klubit të kaltër në merkato për të zbuluar se kush do të jetë partneri i tij i ri startues në qendrën e mbrojtjes, pas lamtumirës së Kim Min-Jae. Por tani për tani është kujtimi fitues i sezonit të kaluar, në të cilin Rrahmani flet qartë për ndeshjen më të mirë të Napolit: “Ndeshja më e mirë? Patjetër 5-1 ndaj Juventusit në Maradona. Kur mundëm Atalantën në shtëpi, e kuptuam vërtet se kishim mundësi të fitonim titullin”.

Mbrojtësi i Kosovës tashmë ka nënshkruar rinovimin e tij deri në vitin 2027, duke u betuar se ka besim te klubi dhe flet për karrierën e tij: “Kam qenë gjithmonë mbrojtës – kujton ai – që kur kam filluar, edhe pse në fillim kam qenë edhe mesfushor mbrojtës. Fanellën numër 13? Fillimisht kam përdorur 18, më pas në moshën 21 vjeçare ndryshova ekipin dhe vendosa të marr 13 sepse të gjithë thanë se ishte një numër i pafat. Përkundrazi, më solli fat”.

Rrahmani u stërvit sot me emrat e mëdhenj tashmë në fushë. Objektivi për mbrojtësin dhe trajnerin e ri Rudi Garcia është miqësorja e së hënës kundër Spalit, ku emrat e mëdhenj do të zbresin për herë të parë në fushë me afrimin e këtij sezoni të ri.

MARKETING