VLEN kërkon hetim për lidhjet e dyshuara afariste mes kompanive të afërta me BDI-në dhe Alta Bankës

VLEN ka reaguar lidhur me zhvillimet rreth Alta Bankës, duke ngritur dyshime për lidhje afariste ndërmjet kompanive të afërta me figura të BDI-së dhe strukturave të lidhura me pushtetin në Serbi.
“Kjo kronologji kërkon përgjigje të qarta. Nuk mund të mbetet pa u hetuar një zinxhir transaksionesh që përfshin kompani të afërta me figura të larta politike, ish-struktura të pushtetit dhe institucione financiare në Serbi”, thuhet në reagimin e VLEN-it.

MARKETING

Nga kjo parti kërkojnë që Komisioni Shtetëror për Parandalimin e Korrupsionit dhe Prokuroria Publike të hetojnë transaksionet e kompanisë AS Senjak me Sasho Mijallkovin dhe Alta Bankën, përfshirë kredinë prej 5 milionë eurosh dhe kontratat komunale me vlerë prej 90 milionë denarësh.
VLEN kërkon gjithashtu publikimin e procesverbaleve të takimeve të Bujar Osmanit dhe Ali Ahmetit me Aleksandar Vuçiqin dhe zyrtarë të tjerë serbë.

“Ali Ahmeti personalisht të sqarojë marrëdhëniet afariste të kompanisë së krushkut të tij me Sasho Mijallkovin dhe Alta Bankën, përfshirë kredinë dhe shitblerjen e aksioneve”, theksohet në reagim.
Në fund, VLEN thekson se qytetarët meritojnë transparencë dhe përgjegjësi, duke shtuar se heshtja nuk mund të jetë përgjigje ndaj çështjeve që prekin interesin publik.

MARKETING