(VIDEO) Zënka Filkov-Milloshoski, Mickoski: Çdokush ka të drejtë të ketë ditë të keqe!

Pas mosmarrëveshjeve brenda koalicionit VLEN, për të cilat ditëve të fundit ka folur publikisht ministri i Shëndetësisë, Arben Taravari, përlasjet kanë shpërhtyer edhe në bllokun maqedonas të Qeverisë. Kësaj radhe aktor të përplasjeve publike kanë qenë deputeti i VMRO – DPMNE-së, Antonio Milloshoski dhe ministri i Drejtësisë, Igor Filkov, i cili vjen nga radhët e Lëvizjes ZNAM.

Kryeministri, Hristijan Mickoski beson, se kjo zënkë do të mbetet në dy qendrimet personale të politikanëve duke u shprehur se “çdokush ka të drejtë të ketë ditë të keqe”. Ai tha se, Milloshoski është pjesë e perimetrit më të ngushtë të tij dhe bashkëpunimin me të e vlerësoi si të nivelit më të lartë.

Hristijan Mickoski, Kryeministër i RMV-së

“E di se me çfarë problemi përballet ministri Igor Filkov, e di se në çfarë gjendje e ka gjetur Ministrinë e Drejtësisë, bashkëpunojmë vazhdimisht në bazë ditore në pjesën e reformave, të cilët janë shumë të rëndësishme posaçërisht në sektorin e drejtësisë. Por, ajo që mund të konkludoj, ndërsa jam i bindur se e gjithë kjo do të mbetet në këto dy qëndrime personale, është se, çdokush ka të drejtë të ketë ditë të keqe, kështu që unë mendoj se ajo ditë e keqe përfundon edhe për njërin edhe për tjetrin”.

I pyetur se, a ka probleme me koalicionin VLEN, kryeministri tha se nuk e ka ndjesi të tillë, sipas tij kanë bashkëpunim të jashtëzakonshëm dhe qeveria është stabile.

Hristijan Mickoski, Kryeministër i RMV-së

“Jo, nuk e kam atë ndjenjë. Përkundrazi, kemi bashkëpunim të jashtëzakonshëm. Qytetarët të jenë të sigurt se Qeveria është stabile, këtë Qeveri e mbështesin jozyrtarisht më shumë se dy të tretat dhe zyrtarisht 78 deputetë. Qytetarët, sipas asaj që e shoh nga anketat japin mbështetje, është jashtëzakonisht i madh mendimi pozitiv se edhe Maqedoni po lëviz në drejtim pozitiv”.

Deputeti Milloshoski së fundmi ka kritikuar punën e Filkovit, duke thënë se ministri ka performanca të dobëta sa i përket obligimeve që ka ndërmarrë për reformat në sistemin e drejtësisë.

Ndërkaq, Filkov është kundërpërgjigjur duke theksuar se, që kur është tërhequr nga funksioni i ministrit të Jashtëm, Millososki ka marrë pjesë në mënyrë aktive në krijimin e sistemit kancerogjen të drejtësisë ndërsa ka qenë i kyçur edhe në miratimin e ndëryshimeve të dëmshme të Kodit Penal në vitin 2023, me çka shpëtoi nga përgjegjësia për veprën penale “I fuqishmi”. Sipas ministrit, Milloshoski është i izoluar nga partia dhe për këtë nuk është i informuar për ligjet e reja.

Paraprakisht, ministri i Shëndetësisë dhe njëri ndër liderët e koalicionit “VLEN”, Arben Taravari deklaroi se, mosmarrëveshjet në VLEN shihen nga 100 kilometra larg.

Teuta Buçi /SHENJA/

MARKETING