(VIDEO) Tërhiqet ligji që detyronte nxënësit të këndojnë himnin maqedonas, partitë shqiptare në garë për meritat

Qeveria e ka tërhequr propozim ligjin për arsim të mesëm, ligjë ky i cili parashikonte që gjatë shënimit të patronatit, fillimit dhe përfundimit të vitit shkollor,  në shkollat e mesme të intonohet himni i shtetit. Ndërkaq, ligji i stopua, por filloi  gara e  partive politike shqiptare se kujt i takojnë meritat. Nga Koaliconi VLEN, pjesë e qeverisë theksojnë se ata e kanë stopuar  ligjin.

VLEN

“Pas parashtrimit te amandamenteve nga ana e koalicionit VLEN, qeveria e tërhoqi ligjin për arsim të mesëm. U dëshmua edhe njëherë se faktori kyç që është garantues i interesave shqiptare është vetëm VLEN. Ne vepruam ashtu si na ka hije. Pa zë dhe pa zhurmë. Në lexim të parë dhamë porosinë duke mos e votuar aspak, ndërsa kur duhej, parashtruam amandamente.  Si rezultat kemi tërheqjen e ligjit nga ana e qeverisë”.

Reaguan edhe nga partia opozitare BDI, të cilët deklarojnë se kjo është fitore e popullit. Koridinatori i grupit parlamentarë të Frontit Europian, Blerim Bexheti, thotë se ligji u tërhoq falë reagimit të popullit.

BLERIM BEXHETI, DEPUTET I BDI-SË

“Propozimi për ligjin për shkollim të mesëm nuk u tërhoq nga dëshira e qeveritarëve pa legjitimitet etnik por u tërhoq falë reagimit të fuqishëm  të popullit. Ky është një shembull i qartë i asaj se çfarë mund të arrihet kur zëri i qytetarëve dëgjohet në Kuvend dhe kur ne qëndrojmë të bashkuar për të mbrojtur të drejtat dhe interesat tona”.

Bexheti thotë se Maqedonia e Veriut është shtet multietnik, respekti i ndërsjellë dhe barazia midis shqiptarëve dhe maqedonasve janë gurëthemeli për stabilitet, siguri dhe një të ardhme të qëndrueshme,ndërsa shtoi se cënimi i Marrëveshjes së Ohrit nga Qeveria është i papranueshëm!

Kujtojmë se Ministrja e arsimit dhe shkencës, Vesna Janevska ditë më parë duke e thirrur në propozim ligjin në fjalë, tha se të gjithë që jetojnë dhe veprojnë në këtë shtet duhet t’i respektojnë simbolet kombëtare të këtij shteti.

Samir Mustafa /SHENJA/

MARKETING