Sulme të reja izraelite vrasin një palestinez dhe plagosin katër të tjerë në Gaza
Ushtria izraelite vrau një palestinez të dielën dhe plagosi katër të tjerë në një sulm ajror në qendër të Khan Younisit në jug të Rripit të Gazës, në sulmet më të fundit pavarësisht armëpushimit që vazhdon të jetë në fuqi.
Trupi i viktimës dhe katër të plagosurit me lëndime të ndryshme u dërguan në Spitalin Nasser në Khan Younis pas sulmit izraelit që kishte në shënjestër një grumbull palestinezësh, thanë burime mjekësore për Anadolu.
Dëshmitarët okularë thanë se një dron izraelit kreu të paktën një sulm ndaj këtij grumbullimi.
Në një zhvillim të lidhur me ngjarjen, burime lokale dhe dëshmitarë raportuan se disa automjete ushtarake izraelite hynë në qytetin Bani Suheila, në lindje të Khan Younisit, në agimin e së dielës, të shoqëruara me të shtëna armësh dhe granatime artilerie.
Burimet shtuan se automjetet ushtarake shtynë blloqet e betonit që shënojnë të ashtuquajturën “Vija e Verdhë” disa dhjetëra metra më në perëndim në lagjet Al-Raqab dhe Al-Fajm, duke zgjeruar kështu zonat nën kontrollin ushtarak izraelit.
Dëshmitarët okularë thanë gjithashtu se një buldozer ushtarak izraelit rrënoi disa shtëpi në zonë.
Sipas tyre, dy lagjet kanë përjetuar zhvendosjen e disa familjeve drejt pjesës qendrore dhe perëndimore të Khan Younisit.
“Vija e Verdhë” i referohet kufirit deri ku forcat izraelite u tërhoqën brenda Gazës si pjesë e fazës së dytë të planit të shpallur nga presidenti amerikan Donald Trump për t’i dhënë fund luftës në enklavë. Kjo vijë ndan zonat nën kontroll të plotë ushtarak izraelit nga zonat ku palestinezët lejohen të qëndrojnë.
Ushtria izraelite ka vrarë më shumë se 72.000 njerëz, kryesisht gra dhe fëmijë, dhe ka plagosur mbi 172.000 të tjerë gjatë luftës dyvjeçare në Rripin e Gazës që nga tetori i vitit 2023.
Pavarësisht armëpushimit që hyri në fuqi më 10 tetor 2025, ushtria izraelite ka vazhduar sulmet, duke vrarë mbi 870 persona dhe plagosur më shumë se 2.540 të tjerë, sipas Ministrisë së Shëndetësisë në Gaza.
MARKETING
