Stoltenberg: Ukraina do të jetë pjesë e NATO-s

Shefi i NATO-s, Jens Stoltenberg, ka thënë se Ukraina do të bëhet anëtare e NATO-s.

Sipas mediave të huaja, përcjell Telegrafi, Stoltenberg tha të martën se Ukraina do të bëhet anëtare e aleancës në “afatgjatë”.

Por ka theksuar ai, çështja imediate është që ajo të mbetet një komb i pavarur përballë pushtimit të Rusisë.

“Aleatët e NATO-s kanë rënë dakord që Ukraina do të bëhet anëtare e aleancës sonë, por në të njëjtën kohë kjo është një perspektivë afatgjatë”, citohet të ketë thënë Stoltenberg para gazetarëve gjatë një vizite në kryeqytetin e Finlandës, Helsinki.

Kreu i NATO-s po viziton Finlandën pasi ky vend planifikon të shkojë i vetëm në përpjekjen e tij për t’u bashkuar me aleancën ushtarake perëndimore në vend që të presë Suedinë.

Finlanda dhe fqinji i saj nordik “hoqën” politikat e tyre dekadash të neutralitetit pasi Rusia filloi agresionin mbi Ukrainë një vit më parë dhe aplikoi për t’u bashkuar me NATO-n në maj.

Nga 30 anëtarët e NATO-s, vetëm Hungaria dhe Turqia nuk i kanë miratuar ende aplikimet e tyre.

Presidenti Recep Erdogan i Turqisë është kundër aplikimit të Suedisë për atë që ai thotë se është mbështetja e Stokholmit për Partinë e Punëtorëve të Kurdistanit, të cilën Ankaraja e konsideron si një grup terrorist.

Bisedimet midis Suedisë dhe Turqisë pritet të fillojnë javën e ardhshme, por Ankaraja ka sinjalizuar se nuk ka asnjë garanci për një rezultat të suksesshëm për Stokholmin.

MARKETING