Real Madridi eliminon Atleticon përmes penalltive, në çerekfinale takohet me Arsenalin

Real Madrid kalon si gjithmonë në Champions League, edhe kur nuk është në ditën më të mirë. Skuadra e Ancelottit u kualifikua pas ruletës së penalltive ndaj Atletico Madridit, ndërkohë që koha e rregullt u mbyll me fitoren e Los Colchoneros 1-0. Sfida e parë kishte përfunduar me fitoren 2-1 të Realit.

Skuadra e Simeones shënoi pas 30 sekondash lojë me Gallagher, duke elektrizuar stadiumin. Në minutën e 70-të, Los Blancos fituan penallti, por Vinicius gaboi rëndë, pasi e dërgoi topin në tribunë. Ndeshja më pas shkoi në shtesë, atje ku nuk do të kishte asnjë gol. Në ruletin e penalltive triumfoi Reali 4-2,duke sigurur një vend për në çerekfinale, atje ku e pret Arsenali.
Pas fitores 3-1 në ndeshjen e parë, Aston Villa nuk hasi vështirësi në takimin e kthimit ndaj Brugge, teksa triumfoi 3-0. Pas suksesit 7-1 të Arsenalit në aktin e parë ndaj PSV, skuadra e Artetës nuk shkoi më shumë se një barazim 2-2 në duelin e kthimit në Londër.

Borussia Dortmund siguroi kualifikimin për në çerekfinalen e Ligës së Kampioneve. Verdhezinjtë triumfuan me përmbysje ndaj Lille, me rezultatin 2-1 në Francë. Pas ndeshjes së parë, të mbyllur në barazim 1-1 në Gjermani, Dortmund ia doli të sigurojë kualifikimin në transfertë.

MARKETING