Putin: Rusia do të bëjë “çdo gjë të mundshme” për të thelluar integrimin në Bashkimin Ekonomik Euroaziatik

Putin: Rusia do të bëjë “çdo gjë të mundshme” për të thelluar integrimin në Bashkimin Ekonomik Euroaziatik

Presidenti rus Vladimir Putin ka thënë se Moska do të bëjë gjithçka që është e mundur për të thelluar integrimin në Bashkimin Ekonomik Euroaziatik (EAEU), ndërsa vendi mori presidencën e bllokut për herë të dytë që nga fillimi i tij në vitin 2014, transmeton Anadolu Agency (AA).

“Ne do të bëjmë gjithçka që është e mundur për të thelluar më tej integrimin në të gjitha fushat – në sferën politike, ekonomike, industriale, financiare dhe teknologjike. Në këtë drejtim, ne e konsiderojmë të arsyeshme që së bashku të vlerësojmë progresin e zbatimit të Drejtimeve Strategjike aktuale për Zhvillimin e Integrimit Ekonomik Euroaziatik deri në vitin 2025”, ka thënë Putin, sipas një deklarate të Kremlinit.

Putin ka deklaruar se blloku duhet të fillojë gjithashtu përgatitjen e dokumenteve të reja të planifikimit afatgjatë këtë vit që, do të përcaktojnë rrugën e integrimit.

Zhvillimi i EAEU-së në vitet e fundit dhe integrimi i ngushtë i tij është bërë “përgjigje e denjë ndaj problemeve globale si varfëria, ndryshimet klimatike, mungesa e burimeve … të cilat janë rënduar për shkak të pandemisë dhe aplikimit të sanksioneve të paligjshme nga një numër vendesh”, ka shtuar presidenti rus.

“Bashkimi (Ekonomik Euroaziatik) ka çdo mundësi për t’u bërë një nga polet e fuqishme, të pavarura, të vetëmjaftueshme të botës shumëpolare në zhvillim, për të qenë një qendër tërheqëse për të gjitha shtetet e pavarura që ndajnë vlerat tona dhe kërkojnë bashkëpunim”, ka theksuar Putin.

Udhëheqësi rus ka thënë se teknologjia, avancimi digjital, agro-industria, energjia, reduktimi i përdorimit të monedhave të huaja dhe sistemeve të pagesave në tregti, konkurrueshmëria ekonomike, transporti dhe logjistika, punësimi dhe bashkëpunimi ndërkombëtar janë vendimtare në zhvillimin e mëtejshëm të integrimit në EAEU dhe përforcojnë rëndësinë e bllokut.

“Për më shumë se një mijëvjeçar, popujt tanë kanë jetuar së bashku dhe kanë eksploruar së bashku hapësirën e tyre gjeografike. Kuptimi i përbashkët i fatit historik, ndërgjegjësimi për lidhjen ekonomike shekullore, ruajtja dhe forcimi i bashkësisë kulturore dhe shoqërore të popujve të vendeve të Bashkimit janë çelësi i suksesit të të gjitha aktiviteteve tona”, ka shtuar ai.

E themeluar në vitin 2014 nga krerët e Bjellorusisë, Kazakistanit dhe Rusisë, EAEU është një bllok ekonomik i pesë shteteve post-sovjetike në Euroazi, me përfshirjen e Armenisë dhe Kirgistanit në vitin 2015.

Rusia fitoi kryesimin e bllokut për herë të dytë më 1 janar, duke zëvendësuar Kirgistanin.