Presidenti sirian Al-Sharaa mbërrin në Paris në vizitën e tij të parë në Evropë
Presidenti i Sirisë, Ahmad al-Sharaa ka mbërritur në Paris në vizitën e tij të parë zyrtare në një vend evropian që nga marrja e detyrës, transmeton Anadolu.
Siç raporton agjencia e lajmeve SANA, vizita vjen me ftesë të presidentit francez, Emmanuel Macron.
Al-Sharaa do të zhvillojë bisedime me Macronin të përqendruara në rindërtimin e Sirisë dhe sulmet e përsëritura izraelite në territorin sirian, tha agjencia e lajmeve, duke cituar një burim nga Ministria e Informacionit.
SANA tha se diskutimet pritet t’i japin përparësi zhvillimit ekonomik dhe rindërtimit, me fokus të veçantë në sektorët e energjisë dhe aviacionit, duke shtuar se agjenda përfshin edhe diplomacinë rajonale, veçanërisht lidhjet me Libanin fqinj.
Burimi theksoi rëndësinë e udhëtimit të presidentit sirian, duke e përshkruar atë si një moment historik në marrëdhëniet e jashtme të Sirisë. Kjo është vizita e tij e parë evropiane që nga rënia e ish-regjimit të udhëhequr nga Bashar al-Assad në muajin dhjetor.
Dje, Pallati Elysee konfirmoi se Al-Sharaa do të mbërrijë në Paris të mërkurën. Macron pritet ta presë atë dhe të shprehë mbështetje për ndërtimin e “një Sirie të re, të lirë dhe të qëndrueshme që respekton të gjithë përbërësit e popullit të saj”.
MARKETING
