Palestina: Nuk ka asnjë justifikim për veton e SHBA-së ndaj armë’pushimit në Ga’za

I dërguari palestinez në OKB, Majed Bamya, kritikoi veton e SHBA-së ndaj një rezolute të propozuar për armëpushim në Rripin e Gazës, duke pohuar se nuk ka “asnjë justifikim” për bllokimin e rezolutës për t’i dhënë fund gjenocidit izraelit, raporton Anadolu.

“Izraeli gjithmonë do të pretendojë se kushtet nuk janë përmbushur sepse planet e tij kërkojnë që ai të vazhdojë këtë luftë, të aneksojë tokën dhe të shkatërrojë njerëzit”, i tha Bamya Këshillit të Sigurimit.

Duke i përshkruar sulmet e vazhdueshme të Izraelit si një përpjekje për të “asgjësuar një komb”, ai theksoi se “14 muaj dhe ne ende po debatojmë nëse një gjenocid duhet të ndalet. Nuk ka asnjë justifikim për të vënë veto ndaj një rezolute që përpiqet të ndalojë procesin”.

Ai theksoi rëndësinë e një armëpushimi të pakushtëzuar, duke thënë se është i nevojshëm për të “shpëtuar jetë, të gjitha jetët” dhe ishte hapi i parë drejt zgjidhjes së konfliktit.

“Rezoluta nuk është mesazh i rrezikshëm. Kjo veto është një mesazh i rrezikshëm për Izraelin se ai mund të vazhdojë të zbatojë planet e tij, pikërisht ato që ju kundërshtoni”, tha ai.

Bamya theksoi se vetoja e SHBA-së, e cila bllokoi kërkesën për një armëpushim të pakushtëzuar, mbështeti në mënyrë efektive një luftë që “po vret, sakaton, terrorizon, shkatërron një komb të tërë”.

“Kur është e mjaftueshme?”, pyeti ai, duke i bërë thirrje komunitetit ndërkombëtar që të mbështesë “jetën, lirinë dhe paqen” dhe të refuzojë vrasjen e civilëve si një mjet për qëllime politike.

SHBA-ja vuri veton ndaj një projektrezolute të Këshillit të Sigurimit që kërkonte armëpushim “të menjëhershëm, të pakushtëzuar dhe të qëndrueshëm” në Gaza.

SHBA-ja më parë i vuri veton rezolutave për armëpushim në tetor 2023, dhjetor 2023 dhe në shkurt, ndërsa abstenoi në votime për projektrezoluta të tjera.

MARKETING