Leyla Sherif Emin, shkrimtarja turke nga Shkupi, zgjidhet nënkryetare e Unionit të Grave Poete të Botës Turke

Poetja dhe shkrimtarja turke nga Maqedonia e Veriut, Leyla Sherif Emin, është zgjedhur Nënkryetare e Unionit të Grave Poete të Botës Turke.

Unioni, i cili është themeluar mbi bazën e vullnetarizmit, bashkoi poetet nga vende të ndryshme të botës turke, ku kryetare e Unionit të Grave Poete të Botës Turke është zgjedhur poetja, shkrimtarja dhe aktivistja shoqërore nga Azerbajxhani, Xuraman Muradova, ndërsa si nënkryetare janë zgjedhur Inci Okumuş nga Turqia dhe Leyla Sherif Emin nga Maqedonia e Veriut.

Qëllimi themelor i Unionit është të promovojë veprat e poeteve femra të botës turke, të ndërtojë ura letrare e kulturore, të mbështesë poetët e rinj dhe përmes poezisë të forcojë unitetin e bashkëpunimin në mbarë botën turke.

– “Kjo rrugë nga Bota Turke deri në Ballkan, qoftë e mbarë dhe me fat për të gjithë”

Poetja dhe shkrimtarja turke nga Shkupi, njëkohësisht Kryeredaktore e revistës “Köprü”, Leyla Sherif Emin, në rrjetet sociale shprehu mirënjohjen e saj duke thënë:

“Me shumë mirënjohje pranova detyrën e nënkryetares së Unionit të Grave Poeteve të Botës Turke. Falënderoj kryetarin e Fondacionit, z. Serhat Kabaklı dhe drejtuesit e tjerë që më besuan këtë përgjegjësi…

Nën këtë çati që bashkon penat femërore të botës turke, dëshiroj që fjala dhe poezia të bëhen ura, rrugët të lidhen me rrugë, të kapërcehen kufijtë në hapësirën tonë shpirtërore përmes poezisë, të veprojmë së bashku dhe të krijojmë një kujtesë të përbashkët…

Le të jetë kjo rrugë nga Bota Turke drejt Turqisë e prej andej deri në Ballkan, e mbarë dhe me fat për të gjithë, inshallah…”

MARKETING