Kush nuk mbron atë që ka, do të shohë dikë tjetër duke e gëzuar

Shkruan: Prof. Dr. Metin Izeti

Marrëdhëniet, sukseset, institucionet, liria, e madje edhe vetë dinjiteti ynë nuk janë prona të përhershme; ato janë me qira, dhe çmimi që duhet të paguajmë çdo ditë për to është kujdesi dhe mbrojtja. Ne shpesh biem në grackën e rreme të rehatisë, duke menduar se pasi kemi arritur diçka, ajo do të mbetet me ne përgjithmonë. Por jeta nuk njeh vakum dhe nuk toleron pasivitetin. Në momentin që ti pushon së vlerësuari dhe së mbrojturi atë që ke, ti sapo ke hapur derën për humbjen e saj.
Bota është e mbushur me një dinamikë të pamëshirshme ku dikush, diku, është gjithmonë më i uritur, më i gatshëm dhe më i vëmendshëm se ti. Nëse ti e neglizhon institucionin, personin që do, dikush tjetër do t’i falë vëmendjen që ti ia mohove. Nëse ti fle mbi rreziqet në biznes apo karrierë, një konkurrent më vigjilent do të të zërë vendin pa thënë as lamtumirë. Madje edhe në rrafshin personal, nëse nuk i mbron kufijtë e tu dhe nuk e ngre zërin për veten, dikush do të vijë dhe do të marrë në dorë kontrollin e jetës tënde, duke të kthyer në një spektator të thjeshtë të fateve të tua.
Kjo nuk do të thotë që ne duhet të jetojmë në ankth apo paranojë të vazhdueshme, por duhet të kuptojmë se mbrojtja është forma më e lartë e mirënjohjes. Të mbrosh atë që ke do të thotë të tregosh me vepra se ajo ka vlerë për ty. Gjërat e çmuara nuk humbasin brenda një nate; ato zbehen gradualisht përmes harresës, nënvlerësimit dhe arrogancës sonë për t’i marrë si të mirëqena. Kur ti dorëzohesh para dembelizmit apo frikës për të luftuar, ti në fakt po nënshkruan transferimin e asaj që zotëron te dikush tjetër. Prandaj, përpara se të bëhet vonë dhe përpara se të të mbetet vetëm pendimi, kthehu dhe shiko se çfarë po lë pas dore sot, sepse ajo që nuk mbron ti sot, nesër do t’i përkasë dikujt tjeter. Tjetri mund te jete armiku, dhe ky eshte rreziku…

MARKETING