Kryetari i PDK-së: Maqedonisë t’i kërkohet llogari për veteranët e UÇK-së dhe gjuhën shqipe

Kreu i PDK-së, Memli Kransiqi për takimin e përbashkët mes dy qeverive, Kosovës dhe Maqedonisë së Veriut, ka thënë se duhet të trajtohen dy çështje serioze, e që sipas tij s’janë në agjendë.
Por, për Kryetarin e PDK-së, para çdo mbledhje tjetër do duhej të kthehej ajo me Shqipërinë.

Sipas Krasniqit, së pari do duhej të diskutohej përndjekja dhe arrestimi i veteranëve të UÇK-së në Maqedoninë e Veriut dhe se të drejtat e shqiptarëve në RMV duhet të mbrohen me vendosmëri.
“Sa i përket takimit me Qeverinë e Maqedonisë së Veriut, janë së paku dy çështje kyçe që duhet të trajtohen seriozisht, e të cilat nuk janë fare në agjendë”

“Së pari, përndjekja dhe arrestimi i veteranëve të UÇK-së në Maqedoninë e Veriut, siç ndodhi gjatë këtij viti, është i papranueshëm dhe cënon raportet tona ndërshtetërore. Qeveria e Kosovës duhet të kërkojë me këmbëngulje që raste të tilla, të cilat po ndodhin tani me qeverinë e re në Maqedoni të Veriut, të mos përsëriten më. Sot, asnjë veteran i UÇK-së nuk është i sigurt të kaloj kufirin me Maqedoninë e Veriut, për shkak të rrezikut që ku shtet të zbatojë fletë-arrestet e Serbisë kundër luftëtarëve të lirisë”, ka thënë Krasniqi në një postim në Facebook.

“Së dyti, të drejtat themelore të shqiptarëve në Maqedoninë e Veriut, përfshirë përdorimin e gjuhës shqipe, duhet të mbrohen me vendosmëri. Qeveria e Kosovës, e posaçërisht politikanët shqiptarë që janë pjesë e Qeverisë së Maqedonisë së Veriut, duhet të ngrisin zërin dhe të angazhohen që përdorimi i gjuhës shqipe të mos i cënohet askujt dhe askund. Çdo përpjekje për t’i cenuar këto të drejta duhet të ndalet menjëherë”, ka shkruar tutje ai.

Derisa këto çështje të adresohen siç duhet, KRasniqi thotë se pikat tjera rrezikojnë të mbeten nën hijen e pakënaqësive të pazgjidhura të popullit shqiptar në RMV.

“Derisa këto çështje urgjente të adresohen siç duhet, pikat e tjera të agjendës rrezikojnë të mbeten nën hijen e pakënaqësive të pazgjidhura të popullit shqiptar në Maqedoninë e Veriut. Bashkëpunimi i vërtetë kërkon një qasje të ndershme dhe proaktive ndaj sfidave të tilla, duke siguruar që dinjiteti dhe të drejtat e të gjithë qytetarëve të respektohen dhe të mbrohen pa dallim. Përndryshe, mbledhje të përbashkëta për shou politik e pa përmbajtje nuk i duhen askujt”, ka shkruar Krasniqi.

MARKETING