Kryeparlamentari i Maqedonisë së Veriut në Romë: Institucione të forta për zbatimin e rregullave ndërkombëtare

Kryetari i Kuvendit të Maqedonisë së Veriut, Afrim Gashi, ka theksuar rëndësinë e institucioneve të forta dhe rolit të parlamenteve në garantimin e zbatimit të qëndrueshëm të së drejtës ndërkombëtare, në një kohë të pasigurisë së shtuar dhe sfidave komplekse gjeopolitike, të sigurisë dhe ekonomike, transmeton Anadolu.

MARKETING

Gashi ka mbajtur fjalim në Konferencën e Kryetarëve të Parlamenteve dhe Sekretarëve të Përgjithshëm të vendeve anëtare të Këshillit të Evropës, e cila po mbahet më 15 dhe 16 tetor në Romë, me temën “Rivendosja e rendit ndërkombëtar të bazuar në rregulla: roli i parlamenteve në përballjen me krizat bashkëkohore dhe reagimin ndaj tyre”.

Para homologëve të tij, Gashi ka theksuar se e drejta ndërkombëtare është parakusht kyç për ruajtjen e paqes dhe stabilitetit, mbrojtjen e sovranitetit dhe të drejtave të shteteve, si dhe përcaktimin e rregullave të qarta në marrëdhëniet ndërkombëtare.

Ai ka vënë në pah rolin e parlamenteve në mbikëqyrjen demokratike, legjitimimin e detyrimeve ndërkombëtare dhe nxitjen e dialogut e bashkëpunimit.

Duke folur për rolin e Këshillit të Evropës, Gashi ka vlerësuar kontributin e organizatës në avancimin e të drejtave të njeriut, demokracisë dhe sundimit të së drejtës. Ai ka theksuar gjithashtu rëndësinë e diplomacisë parlamentare për forcimin e besimit të ndërsjellë, thellimin e dialogut ndërparlamentar dhe zhvillimin e partneriteteve afatgjata të bazuara në bashkëpunim dhe respekt të ndërsjellë.

Gashi ka nënvizuar edhe rëndësinë e bashkëpunimit rajonal dhe veprimeve të koordinuara për forcimin e qëndrueshmërisë kolektive dhe përballimin e sfidave të përbashkëta të sigurisë, ekonomike dhe sociale.

Ai ka përfunduar se, përmes dialogut të hapur, shkëmbimit të përvojave dhe mbështetjes së ndërsjellë, parlamentet mund të kontribuojnë në garantimin e paqes dhe stabilitetit afatgjatë, si dhe të zhvillimit të qëndrueshëm në interes të qytetarëve.