Kancelari gjerman, Merz: Sinjalet nga Abu Dhabi ofrojnë një shans për një rend të vërtetë paqeje në Evropë

Kancelari gjerman, Friedrich Merz, mirëpriti të enjten “sinjalet pozitive” nga bisedimet për paqen në Ukrainë, të zhvilluara në Abu Dhabi, dhe theksoi se ato ofrojnë një mundësi për të ndërtuar një rend të vërtetë paqeje në Evropë, transmeton Anadolu.

MARKETING

“Po dëgjoj disa sinjale pozitive nga diskutimet e zhvilluara në Abu Dhabi gjatë dy ditëve të fundit, gjë që sugjeron se mund të kemi një mundësi – së bashku edhe me amerikanët – për të arritur një rend të vërtetë paqeje në Evropë,” u tha ai gazetarëve në Dublin, në prag të samitit të Komunitetit Politik Evropian.

Këto deklarata erdhën në kohën kur të dërguarit amerikanë, Steve Witkoff dhe Jared Kushner, mbërritën në Moskë pas bisedimeve në Abu Dhabi, për t’u takuar me presidentin rus Vladimir Putin. Merz shprehu shpresën se Moska përfundimisht do të pranojë një format më të gjerë.

“Para së gjithash, pres që qeveria ruse dhe presidenti rus të bien dakord më në fund për diskutime të përbashkëta. Ukraina duhet të jetë në tryezë, evropianët duhet të jenë në tryezë, amerikanët gjithashtu duhet të jenë aty”, theksoi Merz.

“Dhe më pas do të krijohet mundësia për bisedime. Ne kemi formate të vendosura brenda Bashkimit Evropian dhe do të diskutojmë se kush mund ta përfaqësojë BE-në, megjithatë kjo është një çështje që duhet trajtuar me dyer të mbyllura, e jo në një debat publik”, shtoi ai.

MARKETING