Juventus, Motta: Ndaj Atalantës japim maksimumin, grupi i bashkuar

Thiago Motta, tekniku i Juventusit iu përgjigj pyetjeve të gazetarëve para ndeshjes ndaj Atalantës.
Si është skuadra?
Grupi po rikuperohet nga derbi, sepse është e rëndësishme të rikuperojmë mirë fizikisht dhe mendërisht. Në të njëjtën kohë lojtarët janë të zemëruar, sepse nuk fituam dot. Duam të japim maksimumin tonë.
Diçka rreth Koopmeiners…
Diçka kurioze? Jo. Ai është lojtari dhe personi që prisja. Është një djalë që jep shumë çdo ditë dhe ndihmon shokët e ekipit. Ai e vë veten në vështirësi për të tjerët, sepse e ndjen dhe dëshiron të fitojë. Nesër kthehet në një vend ku ka bërë mirë dhe ka fituar. Do të jetë një ndeshje speciale për të. Lojtarët që pritet të mungojnë? Nuk kemi në dispozicion Bremer, Cabal, Conceição dhe Milik. Për Dusan do të shohim më pas.

Rreth Yildiz?
Duke luajtur në të djathtë po bën shumë mirë, ashtu si edhe në të majtë. Po ashtu ka luajtur mirë edhe në qendër kundër Cagliarit në Kupë. Është një djalë që po rritet shumë shpejt. Jam shumë i kënaqur, por duhet të përmirësohet në fazën mbrojtëse, ku duhet të jetë më vendimtar në disa duele. Për më tepër, është gjithmonë i pranishëm dhe ka një fizikalitet që i lejon të jetë gjithmonë i gatshëm për stërvitje.

Po për pozicionin e Douglas Luiz?
Kemi zgjedhur ta aktivizojmë më poshtë për të liruar Thuram më shumë. Ai mund të luajë edhe më përpara. Në derbi duhej t’i menaxhonim edhe forcat e tij për ta mbajtur në nivel gjatë gjithë 90 minutave.

A keni bërë gabime?
Sigurisht që kemi bërë gabime, sepse në shumë ndeshje mund të kishim fituar, por nuk ia dolëm. Ne jemi të parët që zemërohemi, sepse duam gjithmonë të fitojmë duke bërë këtë punë. Tani duhet të rikuperojmë pikët që kemi lënë pas.

A e prisnit rritjen e Mbangula?
Jam shumë i kënaqur me të. Për të qenë i sinqertë, nuk e prisja këtë rritje. Për shkak të vështirësive që kemi pasur, i kemi kërkuar të rritet më shpejt. Kujtojmë se vitin e kaluar luante në një kategori tjetër. Jam shumë i kënaqur, sepse është gjithashtu një djalë shumë altruist. Nuk duhet të kënaqet, por të kërkojë gjithmonë diçka më shumë.

Si është Cambiaso?
Po përmirësohet. E pashë të hyjë shumë mirë në lojë kundër Torinos, shumë i përqendruar dhe i vëmendshëm. Është një djalë shumë i rëndësishëm për ne. Jemi të lumtur që po gjejmë të njëjtin Andrea si në fillim të sezonit.

Sa pikë duhen për zonën Champions?
Sigurisht që nuk jemi të kënaqur me vendin ku jemi tani. Duam të jemi në zonën e Champions-it, ta ngremë nivelin tonë. Nuk ka kuptim të projektojmë shumë përpara, sepse duhet të mendojmë dhe të përqendrohemi te ndeshja e nesërme.

Ju nuk keni fituar kurrë pa Vlahovic…
Të gjithë lojtarët janë të rëndësishëm. Dusan është një lojtar i rëndësishëm për ne. Kolo Muani? Nuk flas për lojtarët e ekipeve të tjera. Siç kam thënë, nuk më pëlqen kur flasin për lojtarët e mi, prandaj nuk flas për lojtarët e skuadrave të tjera.

A është gati skuadra për këtë muaj?
Skuadra është e bashkuar. Nuk duhet të mendojmë shumë përpara, por të qëndrojmë të përqendruar tek ajo që duhet të bëjmë në ndeshjen e radhës. Duhet të mendojmë për çdo ndeshje në maksimum.

MARKETING