Inspektorët e UEFA-s kërkojnë dënimin e Barcelonës, “topi” në fushën e Ceferin

Barcelona rrezikon të mbetet pa Champions League sezonin e ardhshëm pavarësisht se duke fituar LaLiga-n, fitoi automatikisht edhe të drejtën për të marrë pjesë në kompeticionin më të rëndësishëm europian. Ajo që penalizon Barçën është e ashtuquajtura çështja “Negreira” me katalanasit që janë nën hetim për korrupsion ndaj Jose Maria Enrique Negreira i cili nga viti 1994 deri në 2018-tën ishte zëvendëskryetar i Komitetit Teknik të Arbitrave.

Në lidhje me këtë çështje nisi një inspektim edhe UEFA, teksa dy inspektorët Jean Samuel Leuba dhe Mirjam Koller Trunz, pjesë e Komitetit Etik dhe Disiplinës në UEFA, gjejnë fajtorë klubin e Barcelonës. Sipas inspektimit të tyre që nisi më datë 23 mars të vitit të kaluar, Barcelonës do t’i duhet të qëndrojë për një vit jashtë kompeticioneve europianë.

Megjithatë, vendimi final do të merret nga vetë presidenti i UEFA-s, Alexander Ceferin. Aktualisht, UEFA mund të marr një vendim të vetin ose të presë përfundimin e hetimeve nga ana e organeve spanjolle, megjithatë Ceferin e ka në dorë të marrë në konsideratë apo jo këtë inspektim të Jean Samuel Leuba dhe Mirjam Koller Trunz.

UEFA ka kohë deri më datë 12 qershor, atëherë edhe kur mbyllet zyrtarisht lista e klubeve pjesëmarrëse në Champions League dhe pritet që deri në këtë datë të ketë një vendim për katalanasit.

MARKETING