Hungaria miraton ligjin që ndalon paradat e LGBT-së
Asambleja Kombëtare e Hungarisë miratoi sot një ligj që ndalon tubimet që shkelin rregulloret ekzistuese të mbrojtjes së fëmijëve, duke ofruar në mënyrë efektive baza ligjore për të ndaluar marshimet e “krenarisë”, transmeton Anadolu.
Zëdhënësi i qeverisë Zoltan Kovacs njoftoi vendimin në X, duke deklaruar se shfaqjet publike të homoseksualitetit tani klasifikohen si shqetësim për mbrojtjen e fëmijëve sipas një amendamenti të ri.
Legjislacioni, i paraqitur nga deputetë nga partia qeverisëse Fidesz–KDNP, zgjeron gjobat përtej organizatorëve të ngjarjeve për të përfshirë pjesëmarrësit. Sipas ligjit të ri, gjobat duhet të paguhen brenda 30 ditëve ose do të mblidhen si taksa, me të ardhurat që shkojnë për programet e mbrojtjes së fëmijëve.
Masa është pjesë e politikave më të gjera të Hungarisë nën qeverinë e kryeministrit Viktor Orban, e cila është përballur me kritika nga grupet e të drejtave të njeriut dhe BE-ja për kufizime ndaj të drejtave të LGBT-së.
Legjislacioni bazohet në ligjin e Hungarisë të vitit 2021 për “mbrojtjen e fëmijëve”, i cili kufizon pasqyrimin ose promovimin e homoseksualitetit tek të miturit. Kritikët argumentojnë se masat synojnë të heshtin zërat kritikë duke synuar pakicat dhe ata e quajnë këtë një akt fashizmi dhe jo mbrojtje të fëmijëve.
Organizatorët e “Budapest Pride” kanë kritikuar ligjin, duke pohuar se ai krijon pasiguri të konsiderueshme ligjore dhe paraqet shkelje të shtetit të së drejtës. Pavarësisht ndalimit, ata planifikojnë të vazhdojnë me ngjarjet dhe po shqyrtojnë opsionet ligjore për të sfiduar legjislacionin.
Përveç masave që synojnë komunitetin LGBTQ+, qeveria Orban ka prezantuar reforma të rëndësishme ekonomike për të mbështetur familjet dhe për të inkurajuar nivele më të larta të lindjeve.
Një nga nismat më të dukshme është prurja e një reforme gjithëpërfshirëse për të mbështetur nënat duke i përjashtuar ato në masë të madhe nga pagesa e tatimit mbi të ardhurat. Orban e përshkroi atë si uljen më të madhe të taksave në Evropë dhe në gjithë botën perëndimore, duke shënuar agimin e një epoke të re për ekonominë e Hungarisë.
Masat synojnë të rigjallërojnë ekonominë e goditur nga inflacioni dhe të adresojnë sfidat demografike duke inkurajuar familjet më të mëdha.
Orban ka theksuar rëndësinë e plotësimit të politikës familjare të qeverisë dhe dyfishimit të përfitimeve tatimore në lidhje me fëmijët, duke pranuar se sfidat e mëparshme ekonomike e kishin ulur vlerën e tyre.
Pavarësisht nga stimujt, Hungaria vazhdon të përballet me sfida demografike, me shkallët e lindjeve që mbeten nën nivelin e zëvendësimit të nevojshëm për të mbështetur rritjen e popullsisë.
MARKETING
