Chivu deklarohet për herë të parë në cilësinë e trajnerit të Interit
Cristian Chivu është ndjerë i ‘nderuar’ që është emëruar trajneri i ri i Interit, duke theksuar se do të sjellë sërish në klub ‘ambicie dhe pasion’, duke filluar që nga Kupa e Botës për Klube.
MARKETING
Rumuni rikthehet në ‘Giuseppe Meazza’ pas periudhës së tij si lojtar nga viti 2007 deri në pensionimin e tij në vitin 2014, ndërsa karrierën si trajner e nisi në akademinë e të rinjve të Interit nga viti 2018 deri në 2024.
Ai mori drejtimin e parë të pavarur në shkurt të vitit 2025, kur udhëhoqi Parmën drejt mbijetesës në Serie A, dhe tani zëvendëson Simone Inzaghin në pankinën zikaltër deri në qershor të vitit 2027.
“Duhet të bëjmë atë që një skuadër si Interi është e detyruar të bëjë – të shkojmë deri në fund, të luftojmë për trofe, dhe jemi të gatshëm ta bëjmë këtë”.
Kur u pyet për planet për sezonin e ri, Chivu kujtoi se Interi ka një ndeshje të rëndësishme që i pret javën e ardhshme, në Kupën e Botës për Klube.
“Së pari, duhet të përfundojmë sezonin aktual, sepse nuk ka përfunduar ende. Duhet të jemi të përqendruar, pasionantë dhe ambiciozë për të arritur rezultate të caktuara. Duhet të jemi efikasë dhe efektivë”.
“Kupa e Botës për Klube është afër, ndaj sezoni nuk ka përfunduar. Duam të arrijmë atë që një skuadër si Interi është e aftë të bëjë në këtë kompeticion – të shkojmë deri në fund dhe të provojmë të fitojmë trofeun”.
Ish-mbrojtësi ishte gjithmonë lider si në fushë ashtu edhe jashtë saj, cilësi që shpreson t’i sjellë edhe në rolin e trajnerit të Interit.
“Këto janë faktorë thelbësorë – të jesh i përqendruar është një tjetër. Është e rëndësishme të kesh ambicien e duhur dhe pasion për atë që bën, sepse këto i japin skuadrës vetëbesim dhe besim në vete”.
“Duhet të punojmë për këto, që të kemi mundësinë të arrijmë rezultate konkrete”, përfundoi ai./
MARKETING
