Bytyqi nga Brukseli: Sot hapim skriningun bilateral për Klasterin 2 – Tregu i brendshëm, një nga më të rëndësishmit

“Në cilësinë e zëvendëskryeministrit të një vendi kandidat që tashmë ka nisur negociatat me Bashkimin Evropian, dua t’ju siguroj se po bëjmë çmos për të përmbushur të gjitha kriteret e nevojshme të dhëna nga Bashkimi Evropian në lidhje me të 33 kapitujt”.

Këtë e deklaroi sot në Bruksel zv.kryeministri përgjegjës për çështje ekonomike Fatmir Bytyqi, në fjalimin e tij në hapjen e dialogut bilateral për Klasterin – Tregun e brendshëm.
Zëvendëskryeministri Bytyqi theksoi se që nga themelimi i Komunitetit Ekonomik Evropian në vitin 1957 dhe më pas përmes miratimit të Traktatit të Mastrihtit në 1992 dhe Traktatit të Amsterdamit në vitin 1997, kur u prezantua zona Shengen dhe u finalizua me Traktatin e Lisbonës në vitin 2009, tregu i brendshëm është një nga aspektet më të rëndësishme të funksionimit të Bashkimit Evropian (BE).
Zëvendëskryeministri Bytyqi tha se ishte nder i madh për të që të fliste në fillim të skriningut bilateral të Republikës së Maqedonisë së Veriut nga përfaqësues të Komisionit Evropian dhe institucioneve të tjera të BE-së për Klasterin 2 – Tregu i brendshëm.

“Unë dhe kabineti im siç parashikohet në strukturën tonë të negociatave, jemi emëruar koordinatorë të të gjithë Klasterit 2, krahas koordinimit të Sekretariatit për Çështje Evropiane si institucion i caktuar për koordinim në nivel kombëtar”.

“Pas vendimit të Këshillit Evropian për fillimin e negociatave për anëtarësim me Maqedoninë e Veriut në vitin 2020 dhe pas Konferencës së parë ndërqeveritare verën e kaluar, më në fund filluam procesin e negociatave. Qeveria dhe administrata jonë nuk qëndruan duarkryq duke pritur fillimin e procesit. Që nga dita që fituam statusin e kandidatit në vitin 2004, ne kemi qenë fuqimisht të përkushtuar në transponimin e të drejtës së BE-së (EU acquis) dhe rregulloreve të tjera relevante, kurse gjatë viteve të fundit kemi qenë dhe jemi ende të përkushtuar fuqishëm për përshpejtimin e të gjitha proceseve për të cilat bëhet më shpejt shtet anëtar i BE-së”, tha Bytyqi.
Para të pranishmëve, zëvendëskryeministri theksoi se në raportin e fundit të Komisionit Evropian (KE), në shumicën e kapitujve të klasterit 2, Maqedonia e Veriut është mesatarisht e përgatitur dhe se në vitet e kaluara ka shënuar progres të kufizuar.

Bytyqi i siguroi bashkëbiseduesit nga Brukseli se Maqedonia e Veriut do të përpiqet të përmbushë të gjitha kriteret e kërkuara nga vendi në 33 kapitujt e organizuar në 6 klasterë, si dhe tre fushat shtesë sipas metodologjisë së re.

MARKETING