Arbër Ademi: Precedent i rrezikshëm në tentativën për ndryshimin e Kodit Zgjedhor
Nënkryetari i Bashkimit Demokratik për Integrim (BDI), Arbër Ademi, ka reaguar ndaj mënyrës së re të propozuar për ndryshimet në Kodin Zgjedhor, duke e cilësuar atë si një “precedent të rrezikshëm institucional dhe demokratik”.
MARKETING
Në një deklaratë publike, Ademi thekson se ndryshe nga praktikat e deritanishme, ku ndryshimet në Kodin Zgjedhor janë hartuar me konsensus mes katër partive më të mëdha parlamentare dhe në bashkëpunim me Ministrinë e Drejtësisë, “këtë herë propozimet janë bërë njëanshëm” nga partitë maqedonase dhe koordinatori i koalicionit opozitar shqiptar “Vlen”, pa konsultuar partitë shqiptare opozitare apo shoqërinë civile.
Shkrimi i plotë i Ademit:
Ndryshimet në Kodin Zgjedhor, tradicionalisht dhe institucionalisht, janë propozuar gjithmonë nga Ministria e Drejtësisë ose nga deputetë të katër partive më të mëdha parlamentare, nga pushteti dhe opozita, në frymën e konsensusit dhe gjithëpërfshirjes.
Tash, për herë të parë, është vendosur një precedent i rrezikshëm: ndryshimet janë propozuar njëanshëm, vetëm nga partitë më të mëdha maqedonase dhe koordinatori i “Vlen”-it, pa asnjë konsultim me partitë shqiptare opozitare, pa përfshirje të shoqërisë civile dhe, më shqetësuese akoma, pa marrë parasysh as rekomandimet e OSBE/ODIHR-it.
Aq më keq, këto ndryshime janë hartuar në zyrat e VMRO-së dhe janë prezantuar si “propozim ligjor”, ndërsa organizatat dhe iniciativat që me vite kërkojnë rregulla më të drejta për përfaqësim, janë anashkaluar tërësisht.
Oligarkia dhe partitë maqedonase po e shtyjnë përpara agjendën e tyre, të ndihmuara nga disa “shqiptarë të ndershëm” të stilit millosheviçian, servilë të bindur ndaj pushtetit, por të zhveshur nga çdo përgjegjësi ndaj interesave të qytetarëve shqiptarë.
P.S. Sot ndryshimet e oligarkisë nuk kaluan, votimi është shtyrë, sepse nuk kanë shumicë të dyfisht (Badinterit).
MARKETING
