Albin Kurti e falënderon Hakan Fidanin për dronët Bayraktar TB-2
Kryeministri i Kosovës, Albin Kurti zhvilloi sot një bisedë telefonike me ministrin e Punëve të Jashtme të Turqisë, Hakan Fidan, me të cilin bisedoi për bashkëpunimin në fushën e sigurisë.
Sipas njoftimit nga Kryeministria, Kurti e ka uruar ministrin Fidan për rezultatet e zgjedhjeve dhe detyrën e re duke i ofruar bashkëpunim të plotë dhe të ngushtë në avancimin e mëtejmë të marrëdhënieve bilaterale mes Republikës së Kosovës dhe Turqisë.
“U bisedua për bashkëpunimin në fushën e sigurisë dhe mbrojtjes me ç‘rast, kryeministri Kurti e falënderoi ministrin Fidan për mbështetjen e Turqisë ndaj Kosovës në kuadër të NATO-s si dhe mbështetjen ndaj Forcave të Sigurisë së Kosovës”, thuhet në njoftim.
Kujtojmë se së fundmi arsenalit të ushtrisë sonë i janë shtuar edhe dronë Bayraktar TB-2 të cilët janë blerë pikërisht nga Turqia.
Duke vlerësuar bashkëpunimin e ngushtë ndërmjet Republikës së Kosovës dhe Turqisë, në takim u bisedua edhe për zhvillimet aktuale me interes të përbashkët.
Kryeministri e ftoi ministrin turk për vizitë zyrtare në Kosovë.
Turqia është vend mik e partner i Republikës së Kosovës e cila është ndër vendet e para që ka njohur pavarësinë e Kosovës dhe që vazhdimisht mbështet anëtarësimin e Kosovës në organizata ndërkombëtare.
MARKETING
