Gjyqi për “Onkologjinë 2” ka filluar përsëri, Vasev dhe Nuhi prapë e mohuan fajësinë

Gjykimi në rastin “Onkologji 2”, ndaj ish-drejtorit mjekësor të Klinikës për Radioterapi dhe Onkologji në Shkup, Nino Vasev, dhe ish-drejtorit ekonomik, Nehad Nuhi, ka nisur sërish nga fillimi sot në Gjykatën Themelore Penale në Shkup. Shkak për rifillimin e procedurës është ndryshimi në përbërjen e Këshillit Gjyqësor.

MARKETING

Procesin gjyqësor vazhdon ta udhëheqë gjykatësja Sllavica Naumova-Josifovska, por për shkak të ndryshimit të njërit prej anëtarëve të Këshillit Gjyqësor, procedura duhet të përsëritet nga fillimi.

Ky është rasti i dytë që gjykimi për “Onkologji 2” rifillon nga fillimi. E njëjta gjë kishte ndodhur edhe në nëntor të vitit 2025, për shkak të ndryshimit të njërit prej anëtarëve porotë të Këshillit Gjyqësor. Në atë kohë, palët në procedurë ishin pajtuar që provat materiale të administruara dhe dëshmitë e dëshmitarëve të dëgjuar më parë vetëm të lexoheshin, pa qenë nevoja të paraqiteshin sërish.

Prokurorinë në këtë rast e përfaqëson Marija Gjorgeva nga Prokuroria Themelore Publike për Ndjekjen e Krimit të Organizuar dhe Korrupsionit (PTHP NKOK). Në fillim të seancës së sotme, ajo deklaroi se mbetet pranë fjalëve hyrëse të paraqitura më herët para gjykatës.

Ndërkohë, të dy të akuzuarit, Nino Vasev dhe Nehad Nuhi, sërish deklaruan se nuk ndihen fajtorë për veprat që u ngarkohen.

“Jo. Nuk ndihem fajtor për veprat për të cilat akuzohem”, deklaroi i akuzuari i parë, Nino Vasev.

Edhe i akuzuari i dytë, Nehad Nuhi, u deklarua i pafajshëm, duke pretenduar se nuk e kupton qartë aktakuzën dhe se veprat për të cilat akuzohet nuk kanë të bëjnë me punën e tij në Klinikë.

“Jo, nuk e kam të qartë aktakuzën dhe nuk e di pse jam i akuzuar, sepse kjo aktakuzë nuk ka të bëjë fare me punën time në Klinikë”, deklaroi Nuhi para gjykatës.

Rasti “Onkologjia”, i cili shkaktoi reagime të shumta në opinionin publik, nga Prokuroria është ndarë në dy procedura gjyqësore.

Në rastin “Onkologjia 1”, Nino Vasev dhe dy onkologë të tjerë përballen me akuza për trajtim të pakujdesshëm të pacientëve. Ndërsa në rastin “Onkologjia 2”, që është objekt i procesit të sotëm, ish-drejtorët Nino Vasev dhe Nehad Nuhi akuzohen për vepra të rënda penale, përfshirë keqpërdorimin e pozitës dhe autoritetit zyrtar, mashtrimin në detyrë dhe përvetësimin në detyrë.

MARKETING