Trump zotohet të bëhet “zoti Veto” nëse demokratët fitojnë kontrollin e Kongresit të SHBA-së

Presidenti amerikan, Donald Trump, është zotuar se do të bëhet “zoti Veto” dhe do të bllokojë legjislacionin nëse demokratët fitojnë kontrollin e Kongresit në zgjedhjet e mesmandatit, transmeton Anadolu.

MARKETING

“Unë mendoj se do të kemi rezultate të shkëlqyera. Por nëse nuk fitojmë, do t’i vë veto çdo gjëje. Do të vendos veto, veto”, tha Trump për gazetën New York Post.

“Besoj se do të bëhem zoti Veto. Dhe pastaj, në një moment, ndoshta do të arrijmë marrëveshje”, shtoi ai.

Trump shprehu besim në perspektivat e republikanëve, pavarësisht sondazheve të opinionit publik që favorizojnë demokratët.

Presidenti amerikan hodhi poshtë sondazhet e pafavorshme duke i cilësuar si “të manipuluara”, duke pretenduar se organizatat që kryejnë sondazhe nuk kanë kontaktuar votuesit e vërtetë dhe duke përmendur pjesëmarrjen në tubimet e tij si dëshmi të mbështetjes publike.

Trump paralajmëroi se fitoret e demokratëve në të dyja dhomat e Kongresit, të pasuara nga fitorja e një kandidati demokrat në zgjedhjet presidenciale të vitit 2028, do ta linin vendin “të përfunduar”.

Ai pretendoi se demokratët planifikonin ta zgjeronin Gjykatën e Lartë në 23 vende, ta eliminonin procedurën e filibuster-it në Senat dhe të kufizonin të drejtat e mbrojtura nga Amendamenti i Dytë i Kushtetutës.

– Faljet dhe pasuesit presidencial

I pyetur nëse do të mbronte anëtarët e familjes, stafin e Shtëpisë së Bardhë dhe miliarderin Elon Musk nga thirrjet e mundshme për dëshmi dhe hetimet e Kongresit, Trump tha se do të jepte falje pa hezitim.

Ai përmendi vendimet e tij të mëparshme për falje dhe zbutje dënimesh për të pandehurit e akuzuar në lidhje me trazirat e 6 janarit të vitit 2021 në Kapitolin e SHBA-së.

Trump u fali dënimet rreth 1.500 të pandehurve të përfshirë në trazira në ditën e tij të parë pas rikthimit në detyrë në vitin 2025.

Duke iu përgjigjur spekulimeve për të ardhmen e tij politike, Trump pranoi se kufizimi kushtetues për dy mandate presidenciale, i përcaktuar në Amendamentin e 22-të të Kushtetutës së SHBA-së, ishte “shumë i prerë”.

Ai përjashtoi mundësinë e një kandidimi tjetër presidencial në vitin 2028, pavarësisht pretendimit se sondazhet e brendshme e tregonin atë në krye të kandidatëve të mundshëm.

Trump gjithashtu vlerësoi zv/presidentin JD Vance dhe sekretarin e Shtetit, Marco Rubio, si një dyshe të mundshme të fortë presidenciale.

Ai e përshkroi sekretarin e Thesarit, Scott Bessent, si dikë që duket sikur ka dalë drejtpërdrejt nga “përzgjedhja e aktorëve”.

MARKETING