Rritet keqpërdorimi i AI-së në shkolla, Suedia dhe Danimarka ashpërsojnë masat

Përdorimi gjithnjë e më i madh i inteligjencës artificiale (AI) në arsim po i shtyn qeveritë të rishikojnë rregullat për përdorimin e kësaj teknologjie në shkolla, mes shqetësimeve për rritjen e mashtrimit akademik.

MARKETING

Në Suedi, një studim i fundit ka zbuluar se rastet e nxënësve të pezulluar ose të paralajmëruar për përdorim të paautorizuar të mjeteve të inteligjencës artificiale janë rritur me 688 për qind gjatë periudhës 2023–2025.

Përballë kësaj situate, qeveria suedeze ka nisur një rishikim zyrtar për të vlerësuar mënyrën se si shkollat po përballen me mashtrimin akademik të mundësuar nga teknologjia.

Edhe Danimarka ka vendosur masa të reja për të kufizuar përdorimin e pakontrolluar të chatbotëve me inteligjencë artificiale në shkollat e mesme. Sipas rregullave të reja, nxënësit nga mosha 16 deri në 19 vjeç do të duhet t’i mbrojnë gojarisht punimet e tyre, për të dëshmuar se janë autorët e tyre dhe se e kuptojnë përmbajtjen.
Po ashtu, shkollat do të përdorin sisteme monitorimi të ekraneve dhe masa të tjera teknike gjatë provimeve me shkrim për të kufizuar qasjen në platformat e inteligjencës artificiale.
Megjithatë, autoritetet daneze nuk synojnë ta ndalojnë plotësisht përdorimin e AI-së në arsim. Në disa projekte pilot, nxënësve u është lejuar përdorimi i këtyre mjeteve gjatë përgatitjes për pjesën gojore të provimeve të gjuhës angleze.

Debati mbi rolin e inteligjencës artificiale në arsim po zgjerohet në mbarë botën, ndërsa vendet përpiqen të gjejnë një ekuilibër mes përfitimeve të teknologjisë dhe ruajtjes së integritetit akademik.

MARKETING