Gazetari amerikan, Carlson: Arabia Saudite dhe Katari arrestuan agjentë të Mossad-it që “planifikonin bombardime”
Komentatori politik dhe gazetari amerikan Tucker Carlson pretendoi të hënën se Arabia Saudite dhe Katari kanë kapur dhe “arrestuar agjentë izraelitë të Mossad-it që planifikonin bombardime në ato vende”, transmeton Anadolu.
“Pse do të kryenin izraelitët bombardime në vendet e Gjirit, të cilat po sulmohen gjithashtu nga Irani?”, tha Carlson në emisionin e tij.
“A nuk janë ata në të njëjtën anë?”, pyeti ai.
“Izraeli dëshiron të dëmtojë Iranin, Katarin, Emiratet e Bashkuara Arabe, Arabinë Saudite, Bahreinin, Omanin dhe Kuvajtin”, shtoi ai. Carlson gjithashtu pretendon se Izraeli qëllimisht nxit paqëndrueshmëri midis aleatëve arabë të SHBA-së.
Komentet e fundit vijnë ndërsa SHBA-ja dhe Izraeli vazhdojnë sulmet e tyre ushtarake ndaj Iranit, pas një operacioni të përbashkët të shtunën që vrau udhëheqësin suprem Ali Khamenei dhe disa zyrtarë të lartë. Irani tha se shkollat dhe spitalet janë gjithashtu në shënjestër, duke vrarë qindra civilë.
Në valën e parë të sulmeve, rreth 163 vajza u vranë kur u godit një shkollë në Iranin jugor. Teherani u përgjigj duke shënjestruar Izraelin si dhe asetet ushtarake amerikane në të gjithë rajonin, duke ndërprerë udhëtimet tregtare, duke prishur rrugët e naftës dhe duke rritur çmimet globale të energjisë.
Korpusi i Gardës Revolucionare Islamike tha se goditi më shumë se 500 lokacione amerikane dhe izraelite duke përdorur 700 dronë së bashku me qindra raketa.
Të hënën, një sulm me dron shkaktoi atë që u përshkrua si një “zjarr i kufizuar” në rafinerinë e naftës të Saudi Aramco në Ras Tanura. Ministria e Jashtme iraniane tha se nuk është përgjegjëse për shënjestrimin e rafinerisë së naftës të Saudi Aramco dhe pretendoi në vend të kësaj se Izraeli dhe SHBA-ja kanë kryer sulme me dronë nga bazat në vendet arabe.
Teherani i akuzoi ata se po përpiqen të provokojnë shtetet arabe për të sulmuar Iranin dhe për të shkaktuar një konflikt më të gjerë në të gjithë botën muslimane.
MARKETING
