Visar Ademi pranon humbjen: Nuk bindëm qytetarët e zhgënjyer në Gostivar

Kandidati i pavarur për kryetar të Komunës së Gostivarit, Visar Ademi, u paraqit sot para mediave pas publikimit të rezultateve zgjedhore, duke pranuar se nuk arriti të fitojë besimin e qytetarëve për të sjellë ndryshimin e dëshiruar.

“Rezultatet e zgjedhjeve dërgojnë një mesazh të qartë dhe të fortë. Pavarësisht punës së palodhur dhe kontributit të përkrahësve dhe vullnetarëve tanë, nuk arrita të motivoj qytetarët e zhgënjyer nga politikat e vjetra dhe ata që kanë humbur besimin në procesin zgjedhor që të marrin pjesë në votim,” tha Ademi.

Ai theksoi se, në kohën e shkurtër që kishin në dispozicion, nuk mundi të bindë votuesit se ekziston një alternativë reale ndaj partive të vjetra, të cilat, sipas tij, i kanë lodhur dhe zhgënjyer qytetarët prej vitesh.

Qëllimi im ishte të krijoja një lëvizje për ndryshim, por nuk arrita të fitoj besimin e qytetarëve dhe t’i bind me vizionin dhe planin tim, shtoi Ademi. Ai vuri në dukje se, edhe pse shumë votues nuk morën pjesë në zgjedhje, zëri i atyre që votuan duhet respektuar, pasi kjo është thelbi i demokracisë.

“Shpresoj që fituesi të kuptojë rëndësinë e kësaj fitoreje, por edhe të dëgjojë zërat e heshtur të atyre që këtë herë zgjedhën të mos votojnë. Është e qartë se nevojitet ndryshim, dhe qytetarët e Gostivarit meritojnë punë të ndershme dhe përkushtim për një jetë më të mirë,” u shpreh Ademi.

Ai përfundoi me një thirrje për qytetarët që të mos humbin besimin në mundësinë për një politikë më të mirë, duke falënderuar ekipin dhe të gjithë mbështetësit e tij.

“Edhe pse këtë herë nuk arritëm suksesin që dëshironim, ju ftoj të mos humbim besimin në ndryshim dhe të vazhdojmë punën për një të ardhme më të mirë,” përfundoi Ademi.

MARKETING