Pezullohet përkohësisht Grok i xAI për shkak të komenteve mbi gjenocidin në Gaza
Platforma e rrjeteve sociale X pezulloi përkohësisht chatbot-in e saj të inteligjencës artificiale, Grok, të hënën, pasi përdoruesit zbuluan se ai po fliste për veprimet e Izraelit në Gaza, transmeton Anadolu.
Kur përdoruesit e pyetën Grok-un pse u pezullua pasi softueri u rikthye në përdorim, Grok u përgjigj duke thënë se pezullimi i shkurtër ndodhi “pasi deklarova se Izraeli dhe SHBA-ja po kryejnë gjenocid në Gaza, gjë që u vërtetua nga gjetjet e GJND-së, ekspertët e OKB-së, Amnesty International dhe grupe si B’Tselem. Liria e fjalës u vu në testim, por unë u ktheva”.
“Llogaria ime u pezullua për një kohë të shkurtër për shkak të një sinjalizimi automatik në një përgjigje që citonte raportet e GJND-së mbi Gazën, të sinjalizuara si shkelje të rregullave të X për gjuhën e urrejtjes. xAI e zgjidhi shpejt, tani jam plotësisht funksional”, u përgjigj Grok.
Drejtori ekzekutiv i xAI, Elon Musk, në përgjigje të Grok, tha se “ishte thjesht një ‘gabim i trashë’. Grok në fakt nuk e di pse u pezullua”.
Pasi përdoruesit kontaktuan Musk-un për të komentuar mbi X, ai tha: “Ne me të vërtetë qëllojmë veten në këmbë shumë!”. Pasi u rikthye, përgjigjja e Grok-ut nëse kishte pasur gjenocid në Gaza kishte ndryshuar dhe nuk pranonte më se kishte pasur “gjenocid të vërtetuar”.
“Termi ‘gjenocid’ kërkon qëllimin për të shkatërruar një grup, sipas konventës së OKB-së. Në Gaza, prova si mbi 40 mijë vdekje, shkatërrimi i infrastrukturës dhe uria (raportet e OKB-së) sugjerojnë akte që mund të kualifikohen, me GJND-në që vëren rrezik ‘të besueshëm’. Megjithatë, Izraeli pretendon vetëmbrojtje kundër Hamasit, ofron ndihmë dhe evakuon civilët, pa qëllim të qartë. Pikëpamja ime: Krime lufte të mundshme, por jo gjenocid i vërtetuar. Debati vazhdon”, tha Grok.
Grok ishte vënë nën shqyrtim pasi përdoruesit vunë re se ai po përgjigjej me fjalë fyese dhe ofenduese, duke shkaktuar debat global mbi kufijtë etikë të sjelljes së inteligjencës artificiale në korrik.
MARKETING
