Trump do t’i nënshtrohet testeve mjekësore
Donald Trump po i nënshtrohet kontrollit të tij vjetor mjekësor, edhe pse presidenti amerikan ka zgjedhur vazhdimisht të mbajë sekret faktet bazë për shëndetin e tij.
Nuk ka asnjë garanci se publikut do t’i tregohet shëndeti i një burri, i cili, në moshën 78-vjeçare, ishte më i moshuari në historinë e SHBA-së që u betua si president.
Nëse historia përsëritet, ekzaminimi i tij i fundit fizik ka të ngjarë të prodhojë një raport të pakët në detaje.
Kjo përfaqëson mundësinë e parë për të zbuluar statusin e shëndetit të Trumpit që nga një atentat kundër tij në Butler, Pensilvani, në korrik të vitit të kaluar.
Në atë kohë, Ronny Jackson, një mbështetës i vendosur që shërbeu si mjeku i tij në Shtëpinë e Bardhë, shkroi një memo duke përshkruar një plagë me armë zjarri në veshin e djathtë të Trumpit.
Një herë ai bëri shaka se presidenti mund të jetonte deri në 200 vjeç nëse do të kishte një dietë më të shëndetshme, shkruan skynews, përcjell Telegrafi.
Dhe pavarësisht se Trump premtoi në një intervistë për CBS gushtin e kaluar se do të publikonte “me shumë kënaqësi” të dhënat e tij mjekësore, ai kurrë nuk e bëri.
Raportohet se gjatë kohës së presidentit Biden në detyrë, raportet mjekësore zakonisht kanë përfshirë statistika jetike si gjatësia, pesha, rrahjet e zemrës, presioni i gjakut dhe rezultatet e kolesterolit, së bashku me çdo simptomë mjekësore.
Kontrolle të tjera kanë përfshirë organet vitale dhe një vlerësim neurologjik.
Por, Trump ka ofruar pak detaje rreth shëndetit të tij gjatë viteve, pavarësisht se vazhdimisht ka vënë në pikëpyetje aftësinë fizike dhe mendore të paraardhësit të tij Biden, i cili është tre vjet më i vjetër.
Në vitin 2020, Trump kontraktoi COVID-19. Pas shërimit të tij, dolën më shumë detaje se ai kishte qenë më i sëmurë sesa ishte zbuluar.
Ndryshe, në nëntor 2023, mjeku i presidentit amerikan publikoi një letër duke thënë se Trump ishte në një shëndet “të shkëlqyer” fizik dhe mendor.
Por mungonin shumë detaje, duke përfshirë peshën, presionin e gjakut dhe nivelet e kolesterolit, ose rezultatet e ndonjë testi.
Gjatë mandatit të tij të parë në detyrë, kontrolli i parë mjekësor si president i Trumpit përfshinte detaje të pilulave të tij të përditshme kundër rënies së flokëve.
Por ekzaminimet mjekësore të mëvonshme ishin më pak transparente.
Në nëntor 2019, Trump iu nënshtrua një ekzaminimi mjekësor i cili nuk u zbulua vetëm tre ditë më vonë.
Një vit më vonë, një ekzaminim zbuloi se ai po merrte ilaçe për të trajtuar kolesterolin e lartë.
Përpara se Trump të kandidonte për herë të parë për postin në vitin 2015, rezultatet e një ekzaminimi mjekësor u përshkruan si “çuditërisht të shkëlqyera” nga mjeku i tij personal.
Dr. Harold Bornstein deklaroi në atë kohë se Trump do të ishte “individi më i shëndetshëm i zgjedhur ndonjëherë në presidencë”.
Mjeku më vonë pranoi për CNN se Trump ia kishte diktuar ato fjalë. /Telegrafi/
MARKETING
